മലപ്പുറം: കൊറോണ വ്യാപനം കണക്കിലെടുത്ത് ജില്ലയിലെ ആരാധനാലയങ്ങളില്‍ അഞ്ചില്‍ കൂടുതല്‍ പേര്‍ പാടില്ലെന്ന കളക്ടറുടെ ഉത്തരവിനെതിരെ മുസ്ലീം മതസംഘടനകള്‍. ജില്ലാ കലക്ടറുടെ തീരുമാനം അടിയന്തിരമായി പുനഃരിശോധിക്കണമെന്ന് സമസ്ത കേരള ജംഇയ്യത്തുല്‍ ഉലമാ പ്രസിഡണ്ട് സയ്യിദ് മുഹമ്മദ് ജിഫ്രി മുത്തുക്കോയ തങ്ങളും ജനറല്‍ സെക്രട്ടറി കെ.ആലിക്കുട്ടി മുസ്ലിയാരും ആവശ്യപ്പട്ടു. യാതൊരു കൂടിയാലോചനയുമില്ലാതെയാണ് കളക്ടര്‍ തീരുമാനമെടുത്തതെന്നും നേതാക്കള്‍ ആരോപിച്ചു.
റംസാന്‍ മാസമായതിനാല്‍ വിശ്വാസികള്‍ക്ക് പള്ളിയില്‍ പോകാനവസരമുണ്ടാവണം. മുസ്ലീം പള്ളിയില്‍ അഞ്ചുപേര്‍ക്ക് മാത്രം പ്രവേശനം എന്ന ഉത്തരവ് ഒറിക്കലും അംഗീകരിക്കാനാകില്ല. പൊതു ഗതാഗതം ഉള്‍പ്പെടെയുള്ള വിഭാഗങ്ങളിലൊന്നും യാതൊരു നിയന്ത്രണവും ഏര്‍പ്പെടുത്താതിരിക്കുകയും പള്ളികളില്‍ മാത്രം ആളുകളെ പരിമിതപ്പെടുത്തുകയും ചെയ്യുന്നത് വിശ്വാസികള്‍ക്ക് പ്രയാസമുണ്ടാക്കുമെന്നും മതനേതാക്കള്‍ പറഞ്ഞു.
മതനേതാക്കളുമായും ജനപ്രതിനിധികളുമായും ചര്‍ച്ച നടത്തിയ ശേഷമെടുത്ത തീരുമാനമെടുത്തതെന്ന് ജില്ലാ കളക്ടര്‍ ഉത്തരവില്‍ വ്യക്തമാക്കിയിരുന്നു.
