ലക്നൗ: ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് കോവിഡ് വാക്സിന്റെ ആദ്യ ഡോസ് സ്വീകരിച്ചു. അര്ഹതയുള്ളവരെല്ലാം കുത്തിവയ്പ് എടുക്കണമെന്ന് അദ്ദേഹം അഭ്യര്ഥിച്ചു. ‘ഇന്ന് ഞാന് ലക്നൗ ശ്യാമപ്രസാദ് മുഖര്ജി സിവില് ആശുപത്രിയില് ‘സ്വദേശി’ കൊറോണ വൈറസ് വാക്സിന്റെ ആദ്യ ഡോസ് സ്വീകരിച്ചു. യുപിയെ കൊറോണ മുക്തമാക്കാന് അര്ഹതയുള്ള എല്ലാവരോടും വാക്സിന് എടുക്കാന് അഭ്യര്ഥിക്കുന്നു’വെന്ന് അദ്ദേഹം ഹിന്ദിയില് പറഞ്ഞു.
കോവിഡ് വാക്സിന് എടുക്കുന്ന ചിത്രവും യോഗി ആദിത്യനാഥ് പോസ്റ്റ് ചെയ്തിട്ടുണ്ട്. നഴ്സ് രശ്മി ജീത് സിംഗാണ് ഭാരത് ബയോടെകിന്റെ കോവാക്സിന് കുത്തിവച്ചത്. വാക്സിനുമായി ബന്ധപ്പെട്ട എല്ലാ വിവരങ്ങളും മുഖ്യമന്ത്രി ചോദിച്ചറിഞ്ഞുവെന്നും കുത്തിവയ്പ് എടുത്തശേഷം അര മണിക്കൂര് കാത്തിരുന്നശേഷമാണ് ആശുപത്രി വിട്ടതെന്നും നഴ്സിംഗ് ഓഫിസറായ രശ്മി പറഞ്ഞതായി പിടിഐ റിപ്പോര്ട്ട് ചെയ്തു.
