കണ്ണൂര്: ക്യാപ്റ്റന് പരാമര്ശ വിഷയത്തില് പിണറായി വിജയനെ പരോക്ഷമായി വിമര്ശിച്ചു കൊണ്ടുള്ള ഫേസ്ബുക്ക് പോസ്റ്റിനെ ന്യായീകരിച്ച് സിപിഎം കണ്ണൂര് മുന് ജില്ലാ സെക്രട്ടറി പി ജയരാജന്. തന്റെ പോസ്റ്റ് വലതുപക്ഷ മാധ്യമങ്ങള് ദുരുദ്ദേശപരമായി ചര്ച്ചയാക്കിയെന്ന് ജയരാജന് ഫേസ്ബുക്കില് കുറിച്ചു. കേരളത്തിലെ എല്ഡിഎഫ് സ്ഥാനാര്ത്ഥികളുടെ ലീഡറാണ് പിണറായി വിജയനെന്നും അദേഹം പറഞ്ഞു.
“കമ്യൂണിസ്റ്റുകാര് വ്യക്തിപൂജയില് അഭിരമിക്കുന്നവരല്ല. സഖാവ് കോടിയേരി മാധ്യമ പ്രവര്ത്തകരുടെ ചോദ്യത്തിന് മറുപടി പറഞ്ഞതു പോലെ, ഈ പാര്ട്ടിയില് ‘എല്ലാവരും സഖാക്ക’ളാണ്” പിണറായിയെ പരോക്ഷമായി വിമര്ശിച്ചുകൊണ്ട് പി. ജയരാജന് കഴിഞ്ഞ ദിവസം ഫേസ്ബുക്കില് കുറിച്ചു. ക്യാപ്റ്റന് എന്നടക്കം പ്രയോഗങ്ങളിലൂടെ പിആര് വര്ക്ക് പിണറായിക്കു വേണ്ടി ശക്തമായിരിക്കെയായിരുന്നു പിണറായിക്ക് നേരെയുള്ള ജയരാജന്റെ ഒളിയമ്പ്.
പിജെ ആര്മ്മിക്കെതിരെ പിണറായി വിജയന് കൈക്കൊണ്ട നിലപാടിനെ വീണ്ടും ഓര്മ്മിക്കുന്നതായിരുന്നു ജയരാജന്റെ പ്രതികരണം. “ജനങ്ങളോട് ചേര്ന്നു നില്ക്കുമ്പോള്, അവര് സ്നേഹഹസൂചകമായി പല തരത്തിലും ഇഷ്ടം പ്രകടിപ്പിക്കും. ചിലര് പാട്ടെഴുതി ഇഷ്ടം പ്രകടിപ്പിക്കും, ചിലര് ഫോട്ടോ വെച്ച് ഇഷ്ടം പ്രകടിപ്പിക്കും, ചിലര് ടാറ്റു ചെയ്തു ഇഷ്ടം പ്രകടിപ്പിക്കും” എന്നായിരുന്നു പിജെ ആര്മ്മിയുടെ പ്രവര്ത്തിയെ പരോക്ഷമായി ന്യായീകരിക്കുന്ന പോസ്റ്റിലെ ഭാഗങ്ങള്.
