ന്യൂദല്ഹി: ക്യാപ്റ്റന് സ്ഥാനം ഋഷഭ് പന്തിനെ മികച്ച കളിക്കാരനാക്കി മാറ്റുമെന്ന് ദല്ഹി ക്യാപിറ്റല്സ് മുഖ്യ പരിശീലകനും മുന് ഓസീസ് ക്യാപ്റ്റനുമായി റിക്കി പോണ്ടിംഗ്. പരിക്കേറ്റ ശ്രേയസ് അയ്യര്ക്ക് പകരം ഋഷഭ് പന്തിനെ ദല്ഹി ക്യാപിറ്റല്സിന്റെ നായകനാക്കിയതിനെ തുടര്ന്നാണ് പോണ്ടിംഗിന്റെ പ്രതികരണം.
ഇംഗ്ലണ്ടിനെതിരായ പരമ്പരയ്ക്കിടെ പരിക്കേറ്റ അയ്യര്ക്ക് ഈ സീസണിലെ ഐപിഎല് നഷ്ടമാകും. അയ്യര്ക്ക് ഐപിഎല് നഷ്ടമാകുന്നത് ദൗര്ഭാഗ്യം തന്നെ. എന്നാല് ഋഷഭ് പന്ത് ഈ അവസരം മുതലാക്കുമെന്നാണ് പ്രതീക്ഷ. അടുത്തകാലത്തെ പ്രകടനങ്ങള് പരിഗണിച്ചാല് പന്ത് നായക സ്ഥാനത്തിന് അര്ഹനാണ്. നായകസ്ഥാനം അദ്ദേഹത്തെ മികച്ച കളിക്കാരനാക്കുമെന്ന് റിക്കി പോണ്ടിംഗ് ട്വിറ്ററില് കുറിച്ചു.
ഈ സീസണില് മിന്നുന്ന ഫോമിലാണ് ഋഷഭ് പന്ത്. ഓസ്ട്രേലിയക്കെതിരായ പരമ്പരയിലും ഇംഗ്ലണ്ടിനെതിരായ പരമ്പരയിലും മികച്ച പ്രകടനം കാഴ്ചവച്ചു. ഈ സീസണിലെ ഐപിഎല്ലില് ഋഷഭ് പന്ത് ദല്ഹിയുടെ ക്യാപ്റ്റനായി അരങ്ങേറും. ആഭ്യന്തര ക്രിക്കറ്റില് ഋഷഭ് പന്ത് നേരത്തെ ദല്ഹിയുടെ ക്യാപ്റ്റനായിട്ടുണ്ട്
ജന്മഭൂമി ഓണ്ലൈന്