കൊല്ക്കത്ത: ഐ ലീഗില് കിരീടം ലക്ഷ്യമിടുന്ന ഗോകുലം കേരള എഫ്സി നിര്ണായകമായ രണ്ട് പോയിന്റ് നഷ്ടപ്പെടുത്തി. റിയല് കശ്മീരിനെതിരായ മത്സരത്തില് സമനില വഴങ്ങിയതോടെയാണ് ഗോകുലത്തിന് രണ്ട് പോയിന്റ് നഷ്ടമായത്. ഇരു ടീമുകളും ഓരോ ഗോള് വീതം നേടി. ഈ മത്സരത്തില് നിന്ന് ഒരു പോയിന്റ് ലഭിച്ച ഗോകുലം പതിമൂന്ന് മത്സരങ്ങളില് 23 പോയിന്റുമായി മൂന്നാം സ്ഥാനത്താണ്.
കളിയുടെ പതിമൂന്നാം മിനിറ്റില് ബാസിത് അഹമ്മദ് ഭട്ട്് റിയല് കശ്മീരിനെ മുന്നിലെത്തിച്ചു. പതിനൊന്ന് മിനിറ്റുകള്ക്കുള്ളില് ഗോകുലം ഗോള് മടക്കി. ഡെന്നിസ് ആന്റ്വി പെനാല്റ്റിയിലൂടെയാണ് സ്കോര് ചെയ്തത്. ആന്റ്വിയെ റിയല് കശ്മീര് താരം ബോക്സിനുള്ളിവെച്ച് ഫൗള് ചെയ്തതിനാണ് പെനാല്റ്റി റഫറി പെനാല്റ്റി വിധിച്ചത്.
തുടക്കത്തില് റിയല് കശ്മീരാണ് ആക്രമിച്ചു കളിച്ചത്. ആദ്യ പകുതിയില് ഇരു ടീമുകള്ക്കും അവസരങ്ങള് ലഭിച്ചു. രണ്ടാം പകുതിയില് ഗോകുലത്തിന്റെ ആധിപത്യമായിരുന്നു. പക്ഷെ കിട്ടിയ അവസരങ്ങള് മുതലാക്കാനായില്ല. അടുത്ത മത്സരത്തില് ഗോകുലം ഞായറാഴ്ച മുഹമ്മദന്സിനെ നേരിടും.
ജന്മഭൂമി ഓണ്ലൈന്