കാസര്‍കോട്: നേമത്ത് ഇത്തവണയും ജയിക്കുന്നത് ബിജെപി ആയിരിക്കുമെന്നതില്‍ സംശയമില്ലെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍. പിണറായി വിജയനോ ഉമ്മന്‍ചാണ്ടിയോ വന്നാലും കാര്യം ഇല്ല. സ്ഥാനാര്‍ത്ഥി നിര്‍ണ്ണയവുമായി ബന്ധപ്പെട്ട് ദേശീയ നേതൃത്വവുമായി ചര്‍ച്ച നടത്തിയശേഷം മഞ്ചേശ്വരത്ത് എത്തി തെരഞ്ഞെടുപ്പ് ഓഫീസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കേരളത്തിന് അന്നമൂട്ടുന്നത് പ്രധാനമന്ത്രി നരേന്ദ്രമോദിയാണെന്നും കെ. സുരേന്ദ്രന്‍ അവകാശപ്പെട്ടു. മോദി നല്‍കുന്ന അരി കൊണ്ടാണ് മൂന്ന് നേരം കേരളം ഉണ്ണുന്നത്. പിണറായി വിജയന്‍ ഒന്നും നല്‍കുന്നില്ലെന്നും കെ സുരേന്ദ്രന്‍ കാസര്‍കോട്ട് ആരോപിച്ചു.
പിണറായി വിജയനുമായി ഉമ്മന്‍ ചാണ്ടിക്കും ചെന്നിത്തലക്കും രഹസ്യ ധാരണയുണ്ട്. അതില്‍ അണികള്‍ക്ക് അതൃപ്തിയുണ്ട്. പിണറായിയെ പിടിച്ചുകെട്ടാന്‍ കോണ്‍ഗ്രസിന് കഴിയില്ലെന്ന് ബോധ്യപ്പെട്ട ജനങ്ങള്‍ ഇന്ന് ബിജെപിയിലാണ് പ്രതീക്ഷ കാണുന്നത്. പല പ്രമുഖ നേതാക്കള്‍ ഇനിയും ബിജെപിയില്‍ എത്തുമെന്നും കെ. സുരേന്ദ്രന്‍ കൂട്ടിച്ചേര്‍ത്തു.
