ബെംഗളൂരു : ഹോട്ടല്‍ ബിസിനസ്സിന്റെ മറവില്‍ ബിനീഷ് കോടിയേരി കള്ളപ്പണം വെളുപ്പിച്ചതായി എന്‍ഫോഴ്‌സ്‌മെന്റ്. മുഹമ്മദ് അനൂപിന്റെ ലഹി ഇടപാടുകളെ കുറിച്ച ബിനീഷിന് കൃതയമായ അറിവുണ്ടായിരുന്നു. അനൂപിന്റെ ബോസ് ബിനീഷാണ്. അതുകൊണ്ടുതന്നെ എന്ത് ആവശ്യപ്പെട്ടാലും അനൂപ് അത് ചെയ്തു നല്‍കുമെന്നും എന്‍ഫോഴ്‌സ്‌മെന്റ് കുറ്റപത്രം.
ബിനീഷ് നല്‍കിയ പണമുപയോഗിച്ച് ബെംഗളൂരുവില്‍ തുടങ്ങിയ ഹോട്ടലില്‍ ലഹരി ഇടപാടുകള്‍ നടത്തി അനൂപ് നിരവധി പണം സമ്പാദിച്ചിട്ടുണ്ട്. ബിസിനസിന്റെ ഭാഗമായി അനൂപ് തുടങ്ങിയ ബാങ്ക് അക്കൗണ്ടിന്റെ ഡെബിറ്റ് കാര്‍ഡ് ബിനീഷാണ് സ്ഥിരമായി ഉപയോഗിച്ചിരുന്നത്. അതുകൊണ്ടുതന്നെ അനധികൃതമായി പണം സമ്പാദിച്ച് വെളുപ്പിച്ചെടുക്കുന്നതുമായി ബന്ധപ്പെട്ട കേസുകളില്‍ ഇതൊരു ഉത്തമ ഉദാഹരണമാണെന്നാണ് ഇഡി കുറ്റപത്രത്തില്‍ പറയുന്നത്. 2012 മുതല്‍ 2019 വരെ 5,17,36,600 രൂപ ബിനീഷിന്റെ അക്കൗണ്ടിലെത്തി. ഇതില്‍ 1,16,76,276 രൂപയ്‌ക്ക് മാത്രമേ ബിനീഷ് ഐടി റിട്ടേണ്‍ സമര്‍പ്പിച്ചിട്ടുള്ളൂവെന്നും കുറ്റപത്രത്തില്‍ പറയുന്നുണ്ട്. ബാക്കി നാല് കോടിയിലധികം രൂപയുടെ ഉറവിടത്തെ കുറിച്ച് പ്രതിക്ക് ഇതുവരെ വിശദീകരിക്കാനായിട്ടില്ലെന്നും കുറ്റപത്രത്തിലുണ്ട്.
കള്ളപ്പണം വെളുപ്പിക്കല്‍ നിരോധന നിയമത്തിലെ രണ്ടാം വകുപ്പനുസരിച്ച് ഏഴ് വര്‍ഷം വരെ തടവും പിഴയും ശിക്ഷ ലഭിക്കാവുന്ന കുറ്റമാണ് നിലവില്‍ ബിനീഷിനെതിരെ കുറ്റപത്രത്തില്‍ ചുമത്തിയിട്ടുള്ളത്. അതേസമയം അനൂപിന്റെ ലഹരി ഇടപാടുകളെകുറിച്ച് തനിക്ക് യാതൊരു അറിവുമുണ്ടായിരുന്നില്ലെന്നാണ് ബിനീഷിന്റെ വാദം. ഇതിനെ ഇഡി പൂര്‍ണമായും തള്ളുകയാണ്. മറ്റ് പ്രതികളുമായി ബിനീഷ് നടത്തിയ വാട്‌സ്ആപ്പ് ചാറ്റിലെ വിവരങ്ങളും പണമിടപാട് രേഖകളും തെളിവായി ചേര്‍ത്തിട്ടുണ്ട്. ബിനീഷിന്റെ ഡ്രൈവര്‍ അനികുട്ടനും ബിസിനസ് പങ്കാളിയായ അരുണിനോടും ചോദ്യം ചെയ്യലിന് ഹാജരാകാന്‍ ആവശ്യപ്പെട്ടിട്ടുണ്ട്.
