തിരുവനന്തപുരം: നിയമസഭാ തെരെഞ്ഞെടുപ്പില്‍ എംപിമാരെ മത്സരിക്കാന്‍ അനുവദിക്കില്ലെന്ന് കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി താരിഖ് അന്‍വര്‍. നിയമസഭാ തെരഞ്ഞെടുപ്പില്‍ ഉമ്മന്‍ ചാണ്ടിക്ക് പ്രചാരണ ചെയര്‍മാന്‍ സ്ഥാനം നല്‍കുന്നത് സംബന്ധിച്ച് ചര്‍ച്ച ചെയ്ത് തീരുമാനിക്കുമെന്നും താരീഖ് അന്‍വര്‍ മാധ്യമങ്ങോട് പറഞ്ഞു.
യുഡിഎഫ് കണ്‍വീനര്‍ എം.എം ഹസ്സനെതിരെ കത്ത് ലഭിച്ചിട്ടില്ല. തദ്ദേശ സ്വയംഭരണ തെരഞ്ഞെടുപ്പില്‍ കോണ്‍ഗ്രസിനേറ്റ തിരിച്ചടിയെ സംബന്ധിച്ച് വ്യക്തമായ റിപ്പോര്‍ട്ട് കേന്ദ്ര നേതൃത്ത്വത്തിന് നല്‍കിയതായും അദേഹം മാധ്യമങ്ങളോട് പറഞ്ഞു.
നിലവില്‍ ലോക്‌സഭാ അംഗങ്ങളായ അടൂര്‍ പ്രകാശ്, ഹൈബി ഈഡന്‍, കെ.സുധാകരന്‍ തുടങ്ങിയവര്‍ കേരളാ രാഷ്‌ട്രീയത്തിലേയ്‌ക്ക് തിരിച്ചുവരുന്നതായും നിയമസഭാ തെരെഞ്ഞെടുപ്പില്‍ മത്സരിക്കുമെന്നും റിപ്പോര്‍ട്ടുകള്‍ പുറത്തുവന്നിരുന്നു. എന്നാല്‍ കേന്ദ്ര നേതൃത്വത്തിന്റെ ഈ തീരുമാനം നേതാക്കാളുടെ നീക്കത്തിന് വലിയ തിരിച്ചടി ആയിരിക്കുകയാണ്.
