ന്യൂദല്‍ഹി : സമ്പന്ന കുടുംബത്തില്‍ പിറന്ന രാഹുല്‍ഗാന്ധിക്ക് കൃഷിയെ കുറിച്ച് എന്തറിയാമെന്ന് കേന്ദ്രമന്ത്രി രാജ്‌നാഥ് സിങ്. ദല്‍ഹി കര്‍ഷക സമരവുമായി ബന്ധപ്പെട്ട് വാര്‍ത്താ ഏജന്‍സിയോട് സംസാരിക്കവേയാണ് കോണ്‍ഗ്രസ് നേതാവിനെതിരെ കേന്ദ്രമന്ത്രി ഇത്തരത്തില്‍ വിമര്‍ശനം ഉയര്‍ത്തിയത്.
താന്‍ ഒരുകൃഷിക്കാരിയുടെ വയറ്റിലാണ് താന്‍ പിറന്നത്. കര്‍ഷകന്റെ മകനാണ്, കൃഷിയെ കുറിച്ച് തനിക്കറിയാം. കേന്ദ്രസര്‍ക്കാര്‍ കര്‍ഷകര്‍ക്കെതിരെ ഒരു തീരുമാനങ്ങളും കൈക്കൊള്ളില്ല. പ്രധാനമന്ത്രി നരേന്ദ്രമോദിയും സാധാരണക്കാരിയായ അമ്മയുടെ വയറ്റിലാണ് ജനിച്ചത്. കര്‍ഷകര്‍ക്ക് അനുകൂലമായ നടപടികളേ സര്‍ക്കാര്‍ കൈക്കൊള്ളൂ.
കര്‍ഷകര്‍ സമരം നടത്തുന്നതില്‍ കേന്ദ്രസര്‍ക്കാരിന് ദുഃഖമുണ്ട്. കര്‍ഷകരെ ബഹുമാനിക്കുന്നു. അവര്‍ നമ്മുടെ അന്നദാതാക്കളാണ്. സാമ്പത്തിക മാന്ദ്യകാലത്ത് അതിനെ മറികടക്കാന്‍ കര്‍ഷകരാണ് സഹായിച്ചത്. നമ്മുടെ സമ്പദ് വ്യവസ്ഥയുടെ നട്ടെല്ലാണ് കര്‍ഷരെന്നും കേന്ദ്രമന്ത്രി കൂട്ടിച്ചേര്‍ത്തു.
