കൊച്ചി: കൊച്ചിയില് യുവനടിയെ അപമാനിച്ച പ്രതികളുടെ ദൃശ്യങ്ങള് പൊലീസ് പുറത്തുവിട്ടു. മെട്രോ സ്റ്റേഷനില് നിന്നുള്ള സിസിടിവിയില് നിന്നുലഭിച്ച പ്രതികളുടെ ചിത്രങ്ങളാണ് പുറത്തുവിട്ടിരിക്കുന്നത്. ഏകദേശം 25 വയസിന് താഴെ പ്രായമുള്ള പ്രതികള് എറണാകുളം ജില്ലയ്ക്ക് പുറത്തുള്ളവരാണ് എന്നാണ് സൂചന. ആലുവ മുട്ടം ജംഗ്ഷനില് നിന്ന് കയറിയ ഇവര് തിരികെ പോയതും മുട്ടം ജംഗ്ഷനില് ഇറങ്ങിയാണെന്ന് സിസിടിവി ദൃശ്യങ്ങളില് നിന്നു വ്യക്തമായിട്ടുണ്ട്.
എന്നാല് സംഭവം പുറത്തു വന്ന് ഒരു ദിവസം പിന്നിട്ടിട്ടും അന്വേഷണം മുന്നോട്ടു കൊണ്ടു പോകാന് സാധിക്കാതെ വന്നതോടെ കടുത്ത സമ്മര്ദത്തില് ആയിരിക്കുകയാണ് പൊലീസ്. ഇതിനിടെ വനിതാ കമ്മിഷനും യുവജന കമ്മിഷനും പൊലീസിനോടു റിപ്പോര്ട്ട് തേടിയിട്ടുണ്ട്. ഈ സാഹചര്യത്തിലാണ് ചിത്രങ്ങള് പുറത്തു വിടാനുള്ള പൊലീസ് തീരുമാനിച്ചത്.
അതേസമയം യുവനടി അപമാനിക്കപ്പെട്ട സംഭവത്തിലെ പ്രതികള് ലുലുമാളിനുള്ളില് പ്രവേശിച്ചത് സെക്യൂരിറ്റി ഉദ്യോഗസ്ഥരെ കബളിപ്പിച്ചാണെന്ന് കണ്ടെത്തിയിരുന്നു. സമൂഹ മാധ്യമം വഴിയുള്ള യുവനടിയുടെ വെളിപ്പെടുത്തലിനെ തുടര്ന്ന് വനിത കമ്മിഷന് സ്വമേധയാ കേസെടുക്കുകയും അടിയന്തിര നടപടി സ്വീകരിക്കാന് പോലീസിന് നിര്ദ്ദേശം നല്കുകയും ചെയ്തിരുന്നു. ഇതിന്റെ പശ്ചാത്തലത്തില് പോലീസ് നടത്തിയ അന്വേഷണത്തിലാണ് പ്രതികള് മാള് ജീവനക്കാരെ കബളിപ്പിച്ചാണ് അകത്തുകടന്നതെന്ന് കണ്ടെത്തിയത്.
സെക്യൂരിട്ടി ഉദ്യോഗസ്ഥര് മുമ്പാകെ പേരോ ഫോണ് നമ്പറോ നല്കാതെ മറ്റൊരാള്ക്ക് ഒപ്പമെന്ന വ്യാജേനയാണ് ഇരുവരും അകത്ത് കടക്കുകയായിരുന്നു. മാളിനുള്ളില് വെറുതെ കറങ്ങി നടന്ന ഇവര് നടിയെ കണ്ടതോടെ താരത്തിന് അടുത്തേക്ക് ചെല്ലുകയായിരുന്നു. ഇതുമായി ബന്ധപ്പെട്ട് നടിയുടെ മൊഴി രേഖപ്പെടുത്തും. നടിയുടെ അമ്മയുടെ മൊഴി രേഖപ്പെടുത്തിക്കഴിഞ്ഞു.
