ജയ്പൂര്: രാജസ്ഥാനിലെ മുതിര്ന്ന നേതാവ് ഘന്ശ്യാം തിവാരി രണ്ടുവര്ഷത്തിനുശേഷം ബിജെപിയില് മടങ്ങിയെത്തി. 2018 ജൂണില് ബിജെപിയില്നിന്ന് രാജിവച്ച് കോണ്ഗ്രസിലെത്തിയ അദ്ദേഹം ശനിയാഴ്ചയാണ് വീണ്ടും പാര്ട്ടി അംഗത്വം സ്വീകരിച്ചത്. ബിജെപി ദേശീയ അധ്യക്ഷന് ജെ പി നദ്ദ നടത്തിയ ഇടപെടലാണ് തിവാരിയെ പാര്ട്ടിയില് തിരികെ എത്തിച്ചതെന്ന് ബിജെപി വൃത്തങ്ങള് അറിയിച്ചതായി ഇന്ത്യ ടുഡേ റിപ്പോര്ട്ട് ചെയ്യുന്നു. ജയ്പൂരില് ബിജെപി സംസ്ഥാന അധ്യക്ഷന് സതീഷ് പുനിയയുടെ സാന്നിധ്യത്തിലാണ് അംഗത്വം സ്വീകരിച്ചത്.
അഞ്ചുവട്ടം എംഎല്എയായി തെരഞ്ഞെടുക്കപ്പെട്ട വ്യക്തിയാണ് ഇദ്ദേഹം. സംസ്ഥാന മന്ത്രിസഭയിലും അംഗമായിരുന്നു. കര്ഷകര് നേരിടുന്ന പ്രതിസന്ധി, മുന്നാക്കക്കാര്ക്കുള്ള സംവരണം, അഴിമതി തുടങ്ങിയ വിഷയങ്ങളില് രാജസ്ഥാന് മുഖ്യമന്ത്രിയായിരുന്ന വസുന്ധര രാജെയുമായുള്ള അഭിപ്രായവ്യത്യാസങ്ങളെ തുടര്ന്നായിരുന്നു അദ്ദേഹം ബിജെപി വിട്ടത്.
ആത്മാര്ത്ഥതയുള്ള, യോഗ്യതയുള്ള ആളുകള് മാറ്റിനിര്ത്തപ്പെട്ടുവെന്നും മാഫിയകളുടെ സ്ഥലമായി സംസ്ഥാന ഘടകം മാറിയെന്നും തിവാരി നേരത്തേ ആരോപണമുന്നിയിച്ചിരുന്നു. തുടര്ന്ന് ബിജെപി ദേശീയ അച്ചടക്ക സമിതി അദ്ദേഹത്തിന് കാരണം കാണിക്കല് നോട്ടിസ് അയച്ചു. പിന്നാലെയാണ് അദ്ദേഹം ബിജെപിയില്നിന്ന് രാജിവച്ച് കോണ്ഗ്രസില് എത്തിയത്.
