മലപ്പുറം : മലപ്പുറം ജില്ലയിലെ നിലമ്പൂര് പോത്തുങ്കല് ഞെട്ടിക്കുളത്ത് രഹ്നയേയും മൂന്നു മക്കളെയും മരിച്ച നിലയില് കണ്ടെത്തിയതിനു പിന്നാലെ ഭര്ത്താവും ആത്മഹത്യ ചെയ്തു. ഗൃഹനാഥനായ ബിനേഷാണ് (36) ആത്മഹത്യ ചെയ്തത്. റബര് തോട്ടത്തില് തൂങ്ങിമരിച്ച നിലയില് ബിനേഷിന്റെ മൃതദേഹം കണ്ടെത്തുകയായിരുന്നു.
ശനിയാഴ്ചയാണ് ബിനേഷിന്റെ ഭാര്യ രഹ്ന(34) മക്കളായ ആദിത്യന്(13), അര്ജുന്(11), അനന്തു (7) എന്നിവരെ മരിച്ച നിലയില് കണ്ടെത്തിയത്. ഇവര് ജീവനൊടുക്കിയ സംഭവത്തില് ബിനേീഷിനെതിരെ രഹ്നയുടെ കുടുംബം രംഗത്തുവന്നിരുന്നു. ബിനേഷിന് മറ്റൊരു സ്ത്രീയുമായുള്ള ബന്ധമാണ് കുടുംബ പ്രശ്നങ്ങളുടെ കാരണമെന്നും കഴിഞ്ഞ മൂന്നുവര്ഷമായി കുടുംബത്തിനുള്ളില് പ്രശ്നങ്ങളുണ്ടെന്നും രഹ്നയുടെ പിതാവ് രാജന് ആരോപിച്ചു. ഭാര്യയും മൂന്നുമക്കളും ആത്മഹത്യ ചെയ്ത വിവരം വിനീഷ് തന്നെയാണ് വിളിച്ചറിയിച്ചതെന്ന് രാജന് പറയുന്നു.
ഭാര്യയും മക്കളും ആത്മഹത്യ ചെയ്യുമ്പോള് ബിനേഷ് സ്ഥലത്തില്ലായിരുന്നു. കണ്ണൂര് ഇരിക്കൂറില് റബ്ബര് ടാപ്പിങ്ങിനു പോയതായിരുന്നു ബിനേഷ്. അവിടെനിന്ന് കഴിഞ്ഞമാസം 29-ന് വന്നതിനുശേഷം നവംബര് മൂന്നിനാണ് തിരികെ പോയത്. രണ്ട് കുട്ടികളുടെ ജന്മദിനം ഒന്നിച്ചാഘോഷിച്ചാണ് മൂന്നിന് തിരിച്ചുപോയത്. രാവിലെ ബിനേഷ് രഹ്നയെ വിളിച്ചതായി പറയുന്നു. എന്നാല് വിവരം കിട്ടാതിരുന്നതിനെത്തുടര്ന്ന് അടുത്ത വീട്ടിലേക്കുവിളിച്ച് നോക്കാന് പറഞ്ഞതനുസരിച്ച് അടുത്ത വീട്ടുകാര് വന്നുനോക്കിയപ്പോഴാണ് വരാന്തയില് തൂങ്ങിമരിച്ച നിലയില് കണ്ടത്.
