തിരുവനന്തപുരം: സ്വര്ണക്കടത്തിനു പിന്നാലെ മന്ത്രി കെ.ടി.ജലീല് വീണ്ടും വിവാദത്തില്. മന്ത്രിക്ക് ഡോക്റ്ററേറ്റ് ലഭിക്കാന് കാരണമായ പ്രബന്ധം അടിമുടി പിശകാണെന്ന് കാട്ടി ഗവര്ണര്ക്ക് പരാതി. സേവ് യൂണിവേഴ്സിറ്റി ക്യാംപയ്ന് കമ്മിറ്റിയാണ് നൂറുകണക്കിന് ഉദ്ധരണികള് അക്ഷരത്തെറ്റുകളോടെ പകര്ത്തിയെഴുതി പ്രബന്ധമായി സമര്പ്പിച്ചാണ് ഉന്നത വിദ്യാഭ്യാസ മന്ത്രി കെ.ടി. ജലീല് കേരള സര്വകലാശാലയില്നിന്ന് ഡോക്ടറേറ്റ് ബിരുദം നേടിയതെന്നും അദ്ദേഹത്തിന്റെ പ്രബന്ധം വിദഗ്ധ സമിതിയെകൊണ്ട് പുനഃപരിശോധിക്കണമെന്നുമാവശ്യപ്പെട്ട് ഗവര്ണര്ക്ക് പരാതി. നല്കിയത്.
മലബാര് ലഹളയില് വാരിയംകുന്നത്ത് കുഞ്ഞഹമ്മദ് ഹാജിയുടെയും ആലിമുസ്ലിയാരുടെയും പങ്കിനെ അധികരിച്ചു തയാറാക്കിയ ഗവേഷണ പ്രബന്ധത്തിനാണ് ജലീല് കേരള സര്വകലാശാലയില്നിന്ന് 2006ല് ഡോക്ടറേറ്റ് സ്വന്തമാക്കിയത്. സിന്ഡിക്കേറ്റ് നിലവിലില്ലാതിരുന്ന പ്രത്യേക കാലയളവില് വൈസ് ചാന്സലര് ആയിരുന്ന ഡോ. എം.കെ.രാമചന്ദ്രന് നായര് ഇടപെട്ട് തന്റെ പ്രത്യേക അധികാരം ഉപയോഗിച്ചാണ് ജലീലിനു ഡോക്ടറേറ്റ് നല്കിയതെന്നു പരാതിയില് പറയുന്നു.
തന്റെ ഗവേഷണഫലം സാധൂകരിക്കാന് ജലീല് ഉപയോഗിച്ചിട്ടുള്ള ഉദ്ധരണികള് പലതും വിഷയവുമായി ബന്ധമില്ലാത്തതാണ്. ഇവയ്ക്ക് വേണ്ട സൂചികകള് ഉപയോഗിച്ചിട്ടില്ല. പ്രബന്ധം പകര്ത്തിയെഴുതിയതാണെന്ന ആരോപണം ഒഴിവാക്കാനായി ഉദ്ധരണികള് വളച്ചൊടിച്ചാണ് കാണിച്ചിരിക്കുന്നത്. മൂലഗ്രന്ഥത്തില്നിന്നുള്ള ഉദ്ധരണികള്ക്കു പകരം പലതവണ പകര്പ്പിനു വിധേയമായവയാണ് ഉപയോഗിച്ചിരിക്കുന്നത് . അതുകൊണ്ടുതന്നെ പ്രബന്ധം അക്ഷരത്തെറ്റുകളുടെ കൂമ്പാരമാണ്. വാരിയംകുന്നത്തു ഹാജിയുടെ പേര് അടുത്ത കാലത്ത് ചര്ച്ചാ വിഷയമായതിനെ തുടര്ന്നു മലബാര് ലഹളയുമായി ബന്ധപ്പെട്ട പ്രസിദ്ധീകരണങ്ങളും പ്രബന്ധങ്ങളും പരിശോധിച്ചപ്പോഴാണ് മന്ത്രിയുടെ പ്രബന്ധവും ശ്രദ്ധയില്പെട്ടതെന്നു സേവ് യൂണിവേഴ്സിറ്റി ക്യാംപയ്ന് കമ്മിറ്റി ഭാരവാഹികള് പറഞ്ഞു.
ഗവേഷകനായ മന്ത്രിയുടെ സ്വന്തം കുറിപ്പുകളില് വ്യാകരണ പിശകുകളുടെ കൂമ്പാരമാണെന്നും പരാതിയില് ചൂണ്ടിക്കാട്ടിയിട്ടുണ്ട്. പരാതി കേരളാ യൂണിവേഴ്സിറ്റി വൈസ് ചാന്സലറുടെ പരിശോധനയ്ക്കു ഗവര്ണര് കൈമാറി. പ്രബന്ധത്തില് ഗവേഷകന്റേതായി മൗലികമായ സംഭാവനകള് ഇല്ലെന്നും അക്കാദമിക് വിദഗ്ധരുടെ പാനലിനെക്കൊണ്ട് ഇത് പുനര്മൂല്യനിര്ണയത്തിനു വിധേയമാക്കണമെന്നും ആവശ്യപ്പെട്ട് സേവ് യൂണിവേഴ്സിറ്റി ക്യാംപയ്ന് കമ്മിറ്റിയാണ് ഗവര്ണര്ക്കു പരാതി നല്കിയത്. ക്യാംപയ്ന് കമ്മിറ്റി നിയോഗിച്ച വിദഗ്ധ സമിതി ജലീലിന്റെ പ്രബന്ധത്തിലെ പിഴവുകള് കണ്ടെത്തിയിരുന്നു. പ്രബന്ധങ്ങള് അപ്ലോഡ് ചെയ്യേണ്ട യുജിസിയുടെ പൊതുസൈറ്റില് ജലീലിന്റെ പ്രബന്ധം ലഭ്യമാകാത്തതുകൊണ്ട് വിവരാവകാശ നിയമപ്രകാരം കേരളാ യൂണിവേഴ്സിറ്റിയില്നിന്ന് പ്രബന്ധത്തിന്റെ പകര്പ്പ് ലഭ്യമാക്കിയാണ് പരിശോധനയ്ക്കു വിധേയമാക്കിയത്.
