ദോഹ: ഖത്തറില് മയക്കുമരുന്ന് കേസില് കുടുങ്ങിയ ഇന്ത്യന് ദമ്പതികള്ക്ക് മോചനത്തിന് വഴിയൊരുങ്ങുന്നു. മുംബൈ പൊലീസും നാര്ക്കോട്ടിക് കണ്ട്രോള് ബ്യൂറോ (എന്സിബി)യും നടത്തിയ നീണ്ട അന്വേഷണത്തിനൊടുവിലാണ് ദമ്പതികള്ക്ക് അനുകൂലമായ തെളിവുകള് കണ്ടെത്തിയത്.
കഴിഞ്ഞ വര്ഷം ജൂലൈയിലാണ് മുംബൈ ആസ്ഥാനമായുള്ള ദമ്പതികളെ നാല് കിലോഗ്രാം ഹാഷിഷുമായി ഖത്തറില് പിടികൂടിയത്. മധുവിധു ആഘോഷത്തിനായി ഖത്തറിലെത്തിയതായിരുന്നു ഒനിബയും ഭര്ത്താവും. ഒനിബ തന്റെ ആദ്യ കുഞ്ഞിനെ ഗര്ഭം ധരിച്ചിരിക്കുന്ന സമയമായിരുന്നു അത്. ഇവരുടെ ഉറ്റബന്ധു ഒനിബക്കും ഭര്ത്താവിനും വിവാഹ സമ്മാനമായി ഖത്തറില് ഒരു മധുവിധു ആഘോഷം വാഗ്ദാനം ചെയ്തത്. ചിലവൊക്കെ ബന്ധുവിന്റെ വക.
2019 ജൂലൈ ആറിന് മുംബൈയില് നിന്നു ദോഹ ഹമദ് അന്താരാഷ്ട്ര വിമാനത്താവളത്തില് വന്നിറങ്ങിയ ഇരുവരും നിമിഷങ്ങള്ക്കുള്ളില് പോലിസിന്റെ പിടിയിലായി. എന്താണ് സംഭവിക്കുന്നതെന്ന് അവര്ക്കും അറിയില്ലായിരുന്നു. പരിശോധനയില് അവരുടെ ലഗേജില് നാല് കിലോഗ്രാം ഹാഷിഷ് കണ്ടെത്തി എന്നതായിരുന്നു കുറ്റം. ഇവരുടെ ഹണിമൂണ് സ്പോണ്സര് ചെയ്ത ബന്ധു ഖത്തറിലുള്ള ഒരു സുഹൃത്തിന് കൈമാറാന് നല്കിയ പാക്കറ്റിലായിരുന്നു ഈ ലഹരിമരുന്നുണ്ടായിരുന്നത്.
ഇതോടെ മയക്കുമരുന്ന് കടത്തിന് ഒനിബയ്ക്കും ഭര്ത്താവ് ശരീഖിനും 10 വര്ഷം തടവും ഒരു കോടി രൂപ പിഴയും ഖത്തറിലെ കോടതി വിധിച്ചു. തുടര്ന്ന് മുംബൈ പൊലീസും എന്സിബിയും ഒരു വര്ഷം നീണ്ടുനിന്ന അന്വേഷണത്തിനൊടുവിലാണ് നിരപരാധികളായ ദമ്പതികളെ ബന്ധു കബളിപ്പിച്ചതാണെന്ന് കണ്ടെത്തിയത്.
തെളിവുകളുടെ വെളിച്ചത്തില് ഒനിബയെയും ഭര്ത്താവിനെയും മോചിപ്പിക്കാന് എന്സിബി ഇപ്പോള് നയതന്ത്ര മാര്ഗങ്ങളിലൂടെ ഖത്തറിനെ സമീപിക്കാന് ഒരുങ്ങുകയാണ്.
