ചെന്നൈ : ബിജെപി നേതാവും നടിയുമായ ഖുശ്ബു സുന്ദര്‍ അറസ്റ്റില്‍. ചിദംബരത്ത് സമരത്തില്‍ പങ്കെടുക്കാന്‍ പോകവേ പോലീസെത്തി അറസ്റ്റ് ചെയ്യുകയായിരുന്നു. സമരത്തിന് അനുമതി ഇല്ലെന്ന് ആരോപിച്ചാണ് അറസ്റ്റ് ചെയ്തിരിക്കുന്നത്.
വിസികെ നേതാവ് മനുസ്മൃതിക്കെതിരെ നടത്തിയ അധിക്ഷേപ പരാമര്‍ശത്തിനെതിരെയാണ് സമരം പ്രഖ്യാപിച്ചിരുന്നത്. വിസികെ നേതാവ് സ്ത്രീകളെ മോശമായി ചിത്രീകരിക്കുന്നു, ഇതിനെതിരെ നടപടി സ്വീകരിക്കണമെന്ന് ആവശ്യപ്പെട്ടാണ് പ്രതിഷേധ സമരം സംഘടിപ്പിച്ചിരുന്നത്. അതേസമയം സ്ത്രീകളുടെ അഭിമാനം കാക്കാന്‍ അവസാനശ്വാസം വരെ പോരാടുമെന്ന് ഖുശ്ബു ട്വിറ്ററിലൂടെ അറിയിച്ചു. പോലീസ് അറസ്റ്റ് ചെയ്തതിന് ശേഷം അനുയായികള്‍ക്കൊപ്പം വാനില്‍ ഇരിക്കുന്ന ചിത്രവും ഖുശ്ബു ട്വീറ്റ് ചെയ്തിട്ടുണ്ട്.
സ്ത്രീസുരക്ഷയെപ്പറ്റി പ്രധാനമന്ത്രി നരേന്ദ്ര മോദി എപ്പോഴും പറയുമെന്നും അദ്ദേഹത്തിന്റെ പാതയില്‍ സഞ്ചരിക്കാനാണ് താന്‍ ശ്രമിക്കുന്നതെന്നും ഖുശ്ബു പറഞ്ഞു. അതിക്രമങ്ങള്‍ക്ക് മുന്നില്‍ തല കുനിക്കില്ലെന്നും ഖുശ്ബു അറിയിച്ചു. എന്നൊല്‍ കരുതല്‍ തടങ്കല്‍ എന്ന നിലയിലാണ് ഖുശ്ബുവിനെ അറസ്റ്റ് ചെയ്തതെന്ന് പോലീസ് വൃത്തങ്ങള്‍ മറുപടി നല്‍കിയത്. കോണ്‍ഗ്രസില്‍ നിന്നും രാജിവെച്ച് അടുത്തിടെയാണ് ഖുശ്ബു ബിജെപിയില്‍ ചേര്‍ന്നത്.
