ഗുവഹാത്തി: പരേഷ് ബാറുവ നേതൃത്വം നല്കുന്ന ആസമിലെ ഭീകര ഗ്രൂപ്പായ ഉള്ഫയുടെ ആസ്ഥാനം ചൈനയിലാണെന്ന് കേന്ദ്രസര്ക്കാര്. നിയമവിരുദ്ധ പ്രവര്ത്തനങ്ങള് തടയുന്നതിനുള്ള ട്രൈബ്യൂണലിലാണ് ഔദ്യോഗികമായി ഇക്കാര്യം കേന്ദ്ര സര്ക്കാര് അറിയിച്ചിരിക്കുന്നത്. ചൈനയിലെ യുനാന് പ്രവിശ്യയിലെ റൂയിലി ആസ്ഥാനമായാണ് ഉള്ഫ (1) ഭീകരര് ഇന്ത്യാ വിരുദ്ധ പ്രവര്ത്തനങ്ങള് നടത്തുന്നത്.
വര്ഷങ്ങളായി ഉള്ഫ നേതാവ് മാത്രമാണ് ചൈന-മ്യാന്മാര് അതിര്ത്തിയിലുള്ള റൂയിലിയില് പ്രവര്ത്തിക്കുന്നതെന്നാണ് കരുതിയിരുന്നത്. എന്നാല് ഇവിടെ ഭീകരര്ക്ക് പരിശീലനവും നല്കുന്നുണ്ട്. പരിശീലനം ലഭിച്ച ഭീകരര് ഇന്ത്യ-മ്യാന്മര് അതിര്ത്തിയിലെ സാഗയിങ് ഡിവിഷനിലാണ് കേന്ദ്രീകരിച്ചിരിക്കുന്നത്.
ഇവര്ക്കെതിരെ മ്യാന്മര് സൈന്യം 2019 ജനുവരി 28ന് നടപടിയെടുത്തതായും ഉള്ഫ ഭീകരര്ക്ക് വന് നാശം സംഭവിച്ചതായും സംസ്ഥാന സര്ക്കാര് സമര്പ്പിച്ച മറ്റൊരു സത്യവാങ്മൂലത്തില് വ്യക്തമാക്കുന്നു. സൈനിക നടപടിയില് ലുങ്മാര്ക്ക്, താക്ക, നീല്ഗിരി ഉള്ഫ ഭീകരക്യാമ്പുകള്ക്ക് കനത്ത ആഘാതമാണ് സംഭവിച്ചത്.
ഉള്ഫ സൈബര് ആക്രമണങ്ങള്ക്കായി ഐടി വിദഗ്ധരെ റിക്രൂട്ട് ചെയ്യുന്നതായും ഇത് ലോ എന്ഫോഴ്സ്മെന്റ് ഏജന്സികള്ക്ക് ഭീഷണിയാണെന്നും സംസ്ഥാനസര്ക്കാര് ട്രൈബ്യൂണലില് വ്യക്തമാക്കി.
ഗുവാഹത്തി ഹൈക്കോടതി ജഡ്ജി ജസ്റ്റിസ് പ്രശാന്ത് കുമാര് ദേക്കയുടെ നേതൃത്വത്തിലുള്ള ട്രൈബ്യൂണലിന് മുമ്പാകെയാണ് കേന്ദ്രസംസ്ഥാന സര്ക്കാരുകള് സത്യവാങ്മൂലം സമര്പ്പിച്ചത്. ഇന്ത്യാവിരുദ്ധ പ്രവര്ത്തനങ്ങള് നടത്തുകയും ഇന്ത്യയുടെ പരാമാധികാരത്തെ വെല്ലുവിളിക്കുകയും ചെയ്യുന്ന ഉള്ഫയുടെ നിരോധനം നീട്ടിക്കൊണ്ടുള്ള ഉത്തരവ് കഴിഞ്ഞ വര്ഷം നവംബറില് ട്രൈബ്യൂണല് അംഗീകരിച്ചിരുന്നു.
