കാസര്കോട്: ജില്ലയില് കൊവിഡ് രോഗവ്യാപനം രൂക്ഷമാകുന്ന പശ്ചാത്തലത്തില് പ്രതിരോധ പ്രവര്ത്തനങ്ങള് കൂടുതല് ശക്തിപ്പെടുത്താന് ജില്ലാകളക്ടര് ഡോ.ഡി.സജിത് ബാബുവിന്റെ നേതൃത്വത്തില് വീഡിയോകോണ്ഫറന്സിങ് വഴി ചേര്ന്ന ജില്ലാതല കൊറോണ കോര് കമ്മറ്റി യോഗത്തില് തീരുമാനിച്ചു. നിയന്ത്രണങ്ങള് ലംഘിക്കുന്നവര്ക്കെതിരെ ശക്തമായ നടപടി സ്വീകരിക്കും. രോഗവ്യാപനം വര്ധിക്കുന്ന സാഹചര്യത്തില് കൊവിഡിനെതിരെ വരും ദിവസങ്ങളില് എല്ലാവരും കൂടുതല് ജാഗ്രത പുലര്ത്തണമെന്ന് കളക്ടര് പറഞ്ഞു. കൂട്ടായ പ്രവര്ത്തനത്തിലൂടെ മാത്രമേ രോഗ വ്യാപന തോത് കുറയ്ക്കാന് കഴിയുവെന്ന് കളക്ടര് ഓര്മ്മിപ്പിച്ചു. പോലീസും മാഷ്പദ്ധതിയുടെ ഭാഗമായ അധ്യാപകരും പരിശോധന നടത്താനും തീരുമാനിച്ചു.
കടകളില് ജീവനക്കാര്ക്ക് കയ്യുറയും മുഖാവരണവും; ലംഘിച്ചാല് ഏഴ് ദിവസം പൂട്ടണം
വ്യാപാര സ്ഥാപനങ്ങളിലെ ജീവനക്കാര്ക്കും കടയുടമയ്ക്കും ഗ്ലൗസ്, മാസ്ക് എന്നിവ കര്ശനമാക്കി. സമ്പര്ക്കത്തിലൂടെ രോഗം വ്യാപിക്കുന്നത് വ്യാപാര സ്ഥാപനങ്ങള് വഴിയാണെന്ന് കണ്ടെത്തിയതിനെ തുടര്ന്നാണ് നടപടി. വ്യാപാര സ്ഥാപനങ്ങളിലെ ജീവനക്കാരും ഉടമയും ഗ്ലൗസ്, മാസ്ക് എന്നിവ ധരിക്കുന്നതില് വീഴ്ച്ച വരുത്തുന്നുണ്ടോയെന്ന് പരിശോധിക്കാന് പോലീസിനെയും മാഷ് പദ്ധതി അധ്യാപകരെയും ചുമതലപ്പെടുത്തി. വീഴ്ച്ച വരുത്തുന്ന വ്യാപാര സ്ഥാപനങ്ങള് ഒരാഴ്ചത്തേക്ക് അടച്ചുപൂട്ടുന്നതടക്കമുള്ള നടപടികള് കൈക്കൊള്ളും.
വിവാഹത്തിന് 50 പേര് മറ്റു ചടങ്ങുകള്ക്ക് ഇരുപത് പേര്
ഇന്ന് മുതല് ജില്ലയില് വിവാഹത്തിന് ആകെ 50 പേര്ക്കും, മറ്റു ചടങ്ങുകള്ക്ക് ആകെ 20 പേര്ക്കും മാത്രമേ പങ്കെടുക്കാന് അനുമതിയുള്ളൂ. ജില്ലയില് കൊവിഡ് രോഗവ്യാപനം രൂക്ഷമാകുന്ന പശ്ചാത്തലത്തിലാണ് നടപടി. ഇതില് വീഴ്ച്ച വരുത്തുന്നവര്ക്കെതിരെ ശക്തമായ നിയമനടപടി ഉണ്ടാകും.
തലപ്പാടി ചെക്ക് പോസ്റ്റില് ഡ്യൂട്ടിക്ക് യൂണിഫോം തസ്തികയിലുള്ളവര്
കൊവിഡ് നിര്വ്യാപനത്തിനായി തലപ്പാടി ചെക്ക്പോസ്റ്റില് ഡ്യൂട്ടിക്ക് മറ്റ് യൂണിഫോം തസ്തികയിലുള്ളവരെയും നിയോഗിക്കാന് ജില്ലാതല കൊറോണ കോര് കമ്മറ്റി യോഗത്തില് തീരുമാനമായി. മോട്ടോര് വാഹന വകുപ്പ്, ഫയര്ഫോഴ്സ്, എക്സൈസ്, ഫോറസ്റ്റ് എന്നീ വകുപ്പുകളിലെ യൂണിഫോം തസ്തികയിലുള്ളവരെയായിരിക്കും ഡ്യൂട്ടിക്ക് നിയോഗിക്കുക.
പട്ടികജാതി -പട്ടികവര്ഗ്ഗ കോളനികളില് കൂടുതല് കരുതല്
ജില്ലയിലെ പട്ടികജാതി -പട്ടികവര്ഗ്ഗ കോളനികളിലെ കോവിഡ് രോഗവ്യാപനം വിലയിരുത്തുന്നതിനും ക്ഷേമം ഉറപ്പാക്കുന്നതിനും പട്ടികജാതി -പട്ടികവര്ഗ്ഗക്ഷേമ ജില്ലാതല ഉദ്യോഗസ്ഥര്ക്ക് യോഗം നിര്ദ്ദേശം നല്കി. പ്രമോട്ടര്മാര് കോളനികള് സന്ദര്ശിക്കുന്നുണ്ടെന്ന് കാസര്കോട് കണക്ട് ആപ്പ് വഴി ഉറപ്പുവരുത്തി,പ്രമോട്ടര്മാരുടെ ഹാജര് ഓണ്ലൈനായി പരിശോധിച്ച് രേഖപ്പെടുത്തുന്നതിനും ബന്ധപ്പെട്ടവര്ക്ക് കളക്ടര് നിര്ദേശം നല്കി.
കളി ആകാം, പക്ഷേ 20 പേര് മാത്രം
കാണികളും കളിക്കാരും ഉള്പ്പെടെ 20 പേരെമാത്രം ഉള്പ്പെടുത്തിക്കൊണ്ട് മാസ്ക് ധരിച്ച് കായിക വിനോദത്തിന് അനുമതി നല്കാന് ജില്ലാതല കൊറോണ കോര് കമ്മറ്റി യോഗത്തില് തീരുമാനിച്ചു. ഇരുപതില് കൂടുതല്പേര് പാടില്ല. കൊവിഡ് മാനദണ്ഡങ്ങള് പാലിക്കണം.
ടാറ്റാ കോവിഡ് ആശുപത്രി പ്രവര്ത്തനമാരംഭിക്കും
തെക്കില് വില്ലേജിലെ ടാറ്റാ കൊവിഡ് ആശുപത്രി പ്രവര്ത്തനം ആരംഭിക്കാന് അടിയന്തര നടപടി സ്വീകരിക്കാന് ഡിഎംഒയ്ക്ക് ജില്ലാ കളക്ടര് നിര്ദേശം നല്കി. ആശുപത്രിയിലേക്ക് ആവശ്യമായ റോഡ്, വൈദ്യൂതി, കുടിവെള്ളം, മറ്റ് സൗകര്യങ്ങള് എന്നിവ പൂര്ത്തിയായതായി ഉറപ്പുവരുത്താന് പൊതുമരാമത്ത്, കെഎസ്ഇബി എക്സിക്യൂട്ടിവ് എഞ്ചിനിയര്മാര്ക്ക് നിര്ദേശം നല്കി.
പൊതുഗതാഗതവുമായി സഹകരിക്കണം
കൊവിഡ് രോഗവ്യാപനത്തിന്റെ പശ്ചാത്തലത്തില് സുരക്ഷിത യാത്രയ്ക്ക് വഴിയൊരുക്കി കെഎസ്ആര്ടിസി ജില്ലയില് നടപ്പിലാക്കിയ ബോണ്ട് (ബസ് ഓണ് ഡിമാന്റ്) പദ്ധതിയുമായി എല്ലാവരും സഹകരിക്കണമെന്ന് ജില്ലാകളക്ടര് അറിയിച്ചു. പൊതു ഗതാഗത സംവിധാനത്തെ പ്രോത്സാഹിപ്പിക്കണം.
ജില്ലാ ആശുപത്രികൊവിഡ് ആശുപത്രി
ഒക്ടോബര് ഒന്നു മുതല് കാഞ്ഞങ്ങാട് ജില്ലാ ആശുപത്രി കൊവിഡ് ആശുപത്രിയായി പ്രവര്ത്തനം ആരംഭിക്കുമെന്ന് ജില്ലാ മെഡിക്കല് ഓഫീസര് (ആരോഗ്യം) ഡോ.എ..വി.രാംദാസ് യോഗത്തില് അറിയിച്ചു. ബല്ല പ്രീമെട്രിക് ഹോസ്റ്റല് കൊവിഡ് ആശുപത്രിയുടെ അനുബന്ധപ്രവര്ത്തനങ്ങള്ക്ക് ജില്ലാ മെഡിക്കല് ഓഫീസര്ക്ക് കൈമാറാന് യോഗത്തില് തീരുമാനമായി.
യോഗത്തില് ജില്ലാ കളക്ടര് ഡോ.ഡി.സജിത് ബാബു അധ്യക്ഷത വഹിച്ചു. സബ്കളക്ടര് ഡി.ആര്.മേഘശ്രീ, എഡിഎം എന്.ദേവീദാസ്, ഡിഎംഒ ഡോ.എ.വി.രാംദാസ്, ആര്ഡിഒ ഷംസുദ്ദീന്, ഫിനാന്സ് ഓഫീസര് കെ.സതീശന്, ഡിവൈഎസ്പി പി.ബാലകൃഷ്ണന് നായര്, വിനോദ് കുമാര്, ഹരിചന്ദ്രനായിക്, മറ്റ് കൊറോണ കോര് കമ്മറ്റി അംഗങ്ങള് എന്നിവര് പങ്കെടുത്തു.
