കാസര്കോട്: കാസര്കോട്ടെ സ്വര്ണനിക്ഷേപത്തട്ടിപ്പില് മുസ്ലിം ലീഗ് എംഎല്എയും സിപിഎമ്മും തമ്മിലുള്ള ഒത്തുകളി പുറത്തായി. ലീഗ് എംഎല്എ എം.സി. കമറുദ്ദീന് ചെയര്മാനായ ഫാഷന് ഗോള്ഡ് ജ്വല്ലറിയില് നിന്ന് സിപിഎം ചാനല് റിയാലിറ്റി ഷോയുടെ പരസ്യത്തിന്റെ പേരില് അരക്കോടിയിലേറെ രൂപ സ്വീകരിച്ചു.
ചാനലിന്റെ റിയാലിറ്റി ഷോയുടെ പേരില് 2009 മുതല് വിവിധ കാലയളവിലായി അരക്കോടിയിലേറെ രൂപ വാങ്ങിയതായുള്ള രേഖകളാണ് പുറത്തുവന്നത്. കൂടാതെ സിപിഎം മുഖപത്രത്തിനും നിക്ഷേപത്തട്ടിപ്പ് നടത്തിയ ജ്വല്ലറിയില് നിന്ന് നിര്ലോഭമായി പരസ്യങ്ങള് നല്കിയിരുന്നു.
നിക്ഷേപകര്ക്ക് ലാഭവിഹിതം നല്കാതെ വഞ്ചിച്ചതിന്റെ പേരില് എംഎല്എയ്ക്കും മുസ്ലിം ലീഗ് ജില്ലാ നേതാവായ പൂക്കോയ തങ്ങള്ക്കുമെതിരെ ഏഴുപതോളം കേസുകള് വിവിധ പോലീസ് സ്റ്റേഷനുകളിലായി രജിസ്റ്റര് ചെയ്തിട്ടുണ്ട്. കേസ് ഒതുക്കിത്തീര്ക്കാന് ആറ് മാസത്തിനകം നിക്ഷേപകര്ക്ക് പണം തിരിച്ചു നല്കുമെന്ന് മുസ്ലിം ലീഗ് സംസ്ഥാന നേതൃത്വം ഉറപ്പുനല്കിയതും സിപിഎം നേതൃത്വത്തിന്റെ കൂടി ഒത്താശയോടെയെന്നാണ് വിവരം. മുസ്ലിം ലീഗ് നേതാവിന്റെ വീട്ടില് നടന്ന മധ്യസ്ഥ ചര്ച്ചയില് കാസര്കോട് ജില്ലാ പഞ്ചായത്ത് അംഗമായ സിപിഎം നേതാവ് പങ്കെടുത്തതായി ലീഗ് നേതൃത്വം തന്നെ വ്യക്തമാക്കിയിരുന്നു. ഫാഷന് ഗോള്ഡ് നിക്ഷേപത്തട്ടിപ്പില് ജനങ്ങളുടെ കണ്ണില് പൊടിയിടാനുള്ള സമരനാടകങ്ങള് മാത്രമാണ് സിപിഎം നടത്തുന്നതെന്ന് അണികള് തന്നെ പറഞ്ഞുതുടങ്ങിയിട്ടുണ്ട്.
ജന്മഭൂമി ഓണ്ലൈന്