പാലക്കാട് : മന്ത്രി കെ.ടി. ജലീല് രാജിവെയ്ക്കണമെന്നാവശ്യപ്പെട്ട് പാലക്കാട് കളക്ട്രേറ്റിലേക്ക് നടത്തിയ മാര്ച്ചില് സംഘര്ഷം. തൃത്താല എംഎല്എ വി.ടി. ബല്റാമിന്റെ നേതൃത്വത്തില് നടത്തിയ പ്രതിഷേധ മാര്ച്ചിന് നേരെ പോലീസ് ലാത്തി വീശി. എംഎല്എ ഉള്പ്പടെ നിരവധി പേര്ക്ക് പരിക്കേറ്റു.
പാലക്കാട് സിവില് സ്റ്റേഷനിലേക്ക് നടത്തിയ മാര്ച്ചിനെ പോലീസ് ബാരിക്കേഡ് ഉപയോഗിച്ച് തടയുകയായിരുന്നു. യൂത്ത് കോണ്ഗ്രസ് പ്രവര്ത്തകര് ബാരിക്കേഡ് തകര്ക്കാന് ശ്രമിച്ചതോടെ പോലീസ് ലാത്തി വീശുകയും ജലപീരങ്കി പ്രയോഗിക്കുകയുമായിരുന്നു.
പ്രവര്ത്തകര്ക്ക് നേരെ കണ്ണീര് വാതക ഗ്രനേഡും പ്രയോഗിച്ചു. തുടര്ന്ന് വി.ടി. ബല്റാം എംഎല്എ ഉള്പ്പടെയുള്ളവരെ പോലീസ് അറസ്റ്റ് ചെയ്ത് നീക്കി.
