തിരുവനന്തപുരം: സ്വര്ണ്ണക്കടത്ത് കേസില് എന്ഫോഴ്സ്മെന്റ് ഡയറക്ടറേറ്റ് ചോദ്യം ചെയ്ത മന്ത്രി കെ.ടി ജലീലിനെ പൊതിഞ്ഞ് സംരക്ഷിച്ച് സിപിഎം. രാജ്യദ്രോഹക്കേസില് ഇഡി ചോദ്യം ചെയ്ത മന്ത്രി രാജിവെയ്ക്കണമെന്ന ആവശ്യം രാഷ്ട്രീയപ്രേരിതമാണെന്ന് സിപിഎം സംസ്ഥാന സെക്രട്ടറിയറ്റ് വ്യക്തമാക്കി.
സ്വര്ണ്ണക്കടത്ത് കേസ് മുതല് ഉയര്ന്ന എല്ലാ പ്രശ്നങ്ങളിലും എത് ഏജന്സി വേണമെങ്കിലും അന്വേഷിച്ചോട്ടെ എന്ന നിലപാടാണ് സംസ്ഥാന സര്ക്കാര് സ്വീകരിച്ചിട്ടുള്ളത്. മറ്റു ചില സംസ്ഥാന സര്ക്കാരുകള് ചെയ്യുന്നതു പോലെ അന്വേഷണ ഏജന്സികളെ തടയുന്ന സമീപനവും എല്ഡിഎഫ് സര്ക്കാരിനില്ല. ഒരു കുറ്റവും ചെയ്തിട്ടില്ലെന്ന ഉറച്ച ബോധ്യം തന്നെയാണ് ഈ നിലപാടില് പ്രതിഫലിക്കുന്നത്.
എന്നാല്, വിവാദമായ നയതന്ത്ര ബാഗേജുകള് അയച്ചവരേയും കൈപ്പറ്റിയവരേയും ചോദ്യം ചെയ്യാന് പോലും മൂന്നു കേന്ദ്ര ഏജന്സികളും തയ്യാറാകാത്തത് ദുരൂഹമാണ്. നയതന്ത്ര ബാഗേജ് വഴി നിരവധി തവണ സ്വര്ണ്ണം കടത്തിയെന്ന് കോടതിയില് പറഞ്ഞ ഏജന്സികള് തന്നെ ഇവരെ അന്വേഷണ പരിധിയില് നിന്നും ഒഴിവാക്കുന്നതും സംശയാസ്പദമാണ്.
ഇ.ഡിയുടെ സ്പെഷ്യല് പ്രോസിക്യൂട്ടറെ ധൃതിപിടിച്ച് മാറ്റിയത് രാഷ്ട്രീയ പ്രേരിതമാണെന്ന് അദ്ദേഹം തന്നെ വ്യക്തമാക്കുകയുണ്ടായി. ഇന്നലെ മന്ത്രി ജലീലില് നിന്നും വിവരം തേടിയ വിവരം ഡല്ഹിയില് ഇഡി മേധാവി തന്നെ പരസ്യപ്പെടുത്തിയ നടപടി അസാധാരണമാണെന്നും സിപിഎം ന്യായീകരിച്ചു.
