ന്യൂദല്ഹി : പ്രധാനമന്ത്രി നരേന്ദ്രമോദിയുടെ സ്വകാര്യ ട്വിറ്റര് അക്കൗണ്ട് ഹാക്ക് ചെയ്തു. മോദിയുടെ വെബ്സൈറ്റിന്റെ പേരിലുള്ള സ്വകാര്യ ട്വിറ്റര് അക്കൗണ്ടായ ആണ് പുലര്ച്ചെ ഹാക്ക് ചെയ്തത്. മണിക്കൂറുകള്ക്കകം തന്നെ അക്കൗണ്ട് പുനഃസ്ഥാപിച്ചതായി അധികൃതര് അറിയിച്ചിട്ടുണ്ട്.
ഹാക്ക് ചെയ്തശേഷം പ്രധാനമന്ത്രിയുടെ ദുരിതാശ്വാസ നിധിയിലേക്ക് ക്രിപ്റ്റോ കറന്സിയായി സംഭാവനയും ഹാക്കര്മാര് ആവശ്യപ്പെട്ടിട്ടുണ്ട്. ജോണ് വിക്ക് അക്കൗണ്ട് ഹാക്ക് ചെയ്തിരിക്കുകയാണെന്നും ഹാക്കര്മാര് ഇതില് ട്വീറ്റ് ചെയ്തിട്ടുണ്ട്.
മോദിയുടെ ഈ സ്വകാര്യ അക്കൗണ്ടിന് 2.5 മില്യണ് ഫോളോവേഴ്സാണ് ഉള്ളത്. അക്കൗണ്ട് ഹാക്ക് ചെയ്യപ്പെട്ടതായി ട്വിറ്റര് ഇന്ത്യ സ്ഥിരീകരിച്ചിട്ടുണ്ട്.
സംഭവത്തെക്കുറിച്ച് ഊര്ജിതമായ അന്വേഷണം നടക്കുകയാണെന്ന് ട്വിറ്ററിന്റെ ഇന്ത്യയിലെ പ്രതിനിധി വെളിപ്പെടുത്തി. മറ്റ് അക്കൗണ്ടുകളെ ഇത് ബാധിച്ചോ എന്നും അന്വേഷണം നടത്തി വരികയാണ്. കഴിഞ്ഞ മാസം അമേരിക്കന് മുന് പ്രസിഡന്റ് ബരാക് ഒബാമയടക്കം പ്രമുഖരുടേയും അക്കൗണ്ടുകള് സമാന രീതിയില് ഹാക്ക് ചെയ്തിരുന്നു.
