തിരുവനന്തപുരം: രാജ്യത്ത് വിഘടനവാദത്തിന് ആഹ്വാനം ചെയ്തതില്‍ ഉറച്ചു നില്‍ക്കുന്നെന്ന് ഇടതു ബുദ്ധിജീവി ഭാസുരേന്ദ്ര ബാബു. പ്രസ്താവന വിവാദമായതിന്റെ പശ്ചാത്തലത്തില്‍ ഓണ്‍ലൈന്‍ മാധ്യമമായ ദ ക്യുവിന് നല്‍കിയ വീഡിയോ അഭിമുഖത്തിലാണ് ഭാസുരേന്ദ്രബാബു ഇക്കാര്യം വ്യക്തമാക്കിയത്. തന്നില്‍ നിന്ന് ഉണ്ടായത് സ്വാഭാവിക പ്രതികരണമാണ്. അയോധ്യയില്‍ രാമക്ഷേത്രത്തിന് തറക്കില്ലാടാന്‍ പ്രധാനമന്ത്രി നരേന്ദ്ര മോദി പോയതിന്റെ പശ്ചാത്തലത്തില്‍ ആയിരുന്നു പ്രതികരണം. മതേതരരാഷ്‌ട്രം എന്ന സങ്കല്‍പത്തില്‍ നിന്ന് ഹിന്ദുരാഷ്‌ട്ര നിര്‍മിതിയിലേക്കാണ് സംഘപരിവാര്‍ പോകുന്നതെങ്കില്‍ മതനിരപക്ഷത ഉയര്‍ത്തി കേരളത്തിന് പുതിയ ഭൂപടം വരക്കേണ്ടി വരുമെന്നാണ് താന്‍ പറഞ്ഞത്. മലബാറും കൊച്ചിയും തിരുവിതാംകൂറും ഉള്‍പ്പെട്ട കേരളത്തെ കേരളമാക്കിയത് ഭാഷ അടിസ്ഥാനത്തിലാണ്. അങ്ങനെ ഭാഷ അടിസ്ഥാനത്തില്‍ രൂപീകരിച്ച കേരളം ഇന്ത്യ യൂണിയനില്‍ ലയിക്കുകയായിരുന്നു. അന്നത്തെ രാഷ്‌ട്രീയ കരാര്‍ ലംഘിച്ചാല്‍ പുതിയ ഭൂപട നിര്‍മിതിയും പരിഗണിക്കേണ്ടിവരും. 1947ന് മുന്‍പ് പാക്കിസ്ഥാനും ബംഗ്ലാദേശും ഒക്കെ അടങ്ങിയ വിശാല ഭൂപടം ആയിരുന്നു ഇന്ത്യയുടേത്. ഇപ്പോള്‍ അങ്ങനെ അല്ലല്ലോ, അതിനാല്‍ ഭൂപടം മാറ്റിവരയ്ക്കുന്നത് പുതിയ പ്രക്രിയ അല്ലെന്നും ഭാസുരേന്ദ്ര ബാബു.
സിപിഎം അനുകൂല പ്രവാസി സംഘടന നവോദയ കള്‍ച്ചറല്‍ ഈസ്റ്റേണ്‍ പ്രോവിന്‍സ് സംഘടിപ്പിച്ച പോസ്റ്റ് ട്രൂത്ത് പൊളിറ്റിക്‌സ് സാമൂഹ്യമാധ്യമങ്ങളുടെ കാലത്ത് എന്ന വെബിനാറിലാണ് രാജ്യദ്രോഹ പരാമര്‍ശവുമായി ഭാസുരേന്ദ്ര ബാബു രംഗത്തെത്തിയത്. ശ്രീരാമജന്മഭൂമിയില്‍ ക്ഷേത്ര ശിലാസ്ഥാപനം നടക്കുന്നതുമായി ബന്ധപ്പെട്ടുയര്‍ന്ന ചര്‍ച്ചയിലായിരുന്നു ഭാസുരേന്ദ്രബാബു രാജ്യവിരുദ്ധ ആഹ്വാനം നടത്തിയത്.
ഇന്ത്യയുടെ ഭൂപടം മാറ്റി വരക്കേണ്ടി വരുമെന്നും ഇന്ത്യന്‍ യൂണിയനില്‍ നിന്ന് കേരളം വിട്ടുപോകുന്നതിനെപ്പറ്റി ആലോചിക്കേണ്ടി വരുമെന്നുമായിരുന്നു പ്രഖ്യാപനം. ചര്‍ച്ചയില്‍ ഇത്തരം ആഹ്വാനം ഉയര്‍ന്നിട്ടും മോഡറേറ്റര്‍മാരോ സംഘാടകരോ ഇതിനെ തടഞ്ഞില്ല എന്നതും വീഡിയോയില്‍ നിന്ന് വ്യക്തമാണ്. ഇടത്-ജിഹാദി അനുയായി സുനിത ദേവദാസ്, ഡിവൈഎഫ്‌ഐ സംസ്ഥാന സെക്രട്ടറി സജീഷ്, കെ. ഗിരീഷ് തുടങ്ങിയവരാണ് ചര്‍ച്ചയിലുണ്ടായിരുന്നത്. ഇവരെല്ലാം ചര്‍ച്ചയില്‍ ഭാസുരേന്ദ്രബാബുവിന്റെ അഭിപ്രായത്തോട് യോജിക്കും വിധം തലയാട്ടുകയായിരുന്നു. ഇതോടെ, വിഷയത്തില്‍ഡ പ്രതിഷേധം ശക്തമായി. രാജ്യദ്രോഹത്തിന് ഭാസുരേന്ദ്ര ബാബുവിനും പങ്കെടുത്ത മറ്റുള്ളവര്‍ക്കുമെതിരേ കേസ് എടുക്കണമെന്ന് ആവശ്യം ശക്തമാവുകയാണ്.
