തിരുവനന്തപുരം : സംസ്ഥാനത്ത് ഇന്ന് മൂന്ന് കൊറോണ മരണം കൂടി. മലപ്പുറം തിരൂരങ്ങാടി സ്വദേശി അബ്ദുള് ഖാദര്, കുമ്പള ആരിക്കാടി സ്വദേശി അബ്ദുള് റഹ്മാന്, ഇരിങ്ങാലക്കുട കൂത്തുപറമ്പ് സ്വദേശിയായ വര്ഗ്ഗീസ് പള്ളന് എന്നിവരാണ് മരിച്ചത്. സംസ്ഥാനത്തെ കൊറോണ രോഗികളുടെ എണ്ണം ആശങ്ക ഉയര്ത്തുന്ന വിധത്തില് വര്ധിച്ചുകൊണ്ടിരിക്കുകയാണ്.
തിരൂരങ്ങാടി സ്വദേശി അബ്ദുള് ഖാദര്(71) മഞ്ചേരി മെഡിക്കല് കോളേജ് ആശുപത്രിയില് ചികിത്സയിലിരിക്കേയാണ് മരണമടയുന്നത്. രോഗബാധയുടെ ഉറവിടം വ്യക്തമല്ല. പനിയും ചുമയും അടക്കം ലക്ഷണങ്ങളുമായി ജില്ലാ ആശുപത്രിയിലാണ് ആദ്യം ചികിത്സ തേടിയത്. ശ്വാസ തടസം ഉണ്ടായതിനെ തുടര്ന്ന് പിന്നീട് മെഡിക്കല് കോളേജ് ആശുപത്രിയിലേക്ക് മാറ്റുകയായിരുന്നു. 19 ന് നടത്തിയ പരിശോധനയിലാണ് കൊറോണ സ്ഥിരീകരിച്ചത്. പ്ലാസ്മ തെറാപ്പിയടക്കം ചികിത്സ നല്കിയെങ്കിലും ഫലമുണ്ടായില്ല. അബ്ദുള് ഖാദറുമായി സമ്പര്ക്കത്തില് ഏര്പ്പെട്ടവരെ കണ്ടത്തി നിരീക്ഷണത്തിലാക്കി.
പരിയാരം മെഡിക്കല് കോളേജില് ചികിത്സയിലിരിക്കെ മരിച്ച കാസര്കോട് കുമ്പള ആരിക്കാടി സ്വദേശി അബ്ദുള് റഹ്മാനും(70) ആണ് രണ്ടാമത്തേത്. വൃക്ക സംബന്ധമായ അസുഖങ്ങള്ക്ക് ചികിത്സ തേടിയിരുന്നതായാണ് വിവരം. ഇതോടെ കാസര്കോട് കൊറോണ ബാധിച്ച്് മരിക്കുന്നവരുടെ എണ്ണം അഞ്ചായി. രോഗ വ്യാപനം അതിരൂക്ഷമായതോടെ കാസര്കോട് അഞ്ച് സ്ഥലങ്ങളില് നിരോധനാജ്ഞ ഏര്പ്പെടുത്തിയിരിക്കുകയാണ്.
ഇരിങ്ങാലക്കുട കൂത്തുപറമ്പ് പള്ളന് വീട്ടില് വര്ഗ്ഗീസ് പള്ളന്റേതാണ് മൂന്നാമത്തെ കൊറോണ മരണം. ഇയാളെ ജൂലൈ 18 നാണ് കൊറോണ സ്ഥിരീകരിച്ച് മെഡിക്കല് കോളേജില് പ്രവേശിപ്പിച്ചത്. തീവ്രപരിചരണ വിഭാഗത്തില് ചികില്സയിലായിരുന്ന വര്ഗ്ഗീസ് ഇന്ന് രാവിലെയോടെ മരണമടയുകയായിരുന്നു. ഇദ്ദേഹത്തിന്റെ മകനും ഭാര്യയും കൊറോണ ബാധിച്ച് മെഡിക്കല് കോളേജ് ആശുപത്രിയില് ചികിത്സയില് കഴിയുകയാണ്.
