കോഴിക്കോട്: രാജ്യത്തെ ഞെട്ടിച്ച സ്വര്‍ണ്ണക്കള്ളക്കടത്ത് കേസിലെ മുഖ്യപ്രതി സ്വപ്ന സുരേഷിനെ 2017 മുതല്‍ മുഖ്യമന്ത്രി പിണറായി വിജയന് അറിയാമെന്ന് ബിജെപി സംസ്ഥാന പ്രസിഡന്റ് കെ.സുരേന്ദ്രന്‍ വാര്‍ത്താ സമ്മേളനത്തില്‍ വെളിപ്പെടുത്തി. സരിത കേസില്‍ ഉമ്മന്‍ ചാണ്ടിയുടെ തനിയാവര്‍ത്തനമാണ് ഇപ്പോള്‍ പിണറായി വിജയന് ചെയ്യുന്നത്. സ്വപ്നയെ തനിക്കറിയില്ലെന്നാണ് മുഖ്യമന്ത്രി പറഞ്ഞത്. 2017 സപ്തംബര്‍ 24 ന് ഷാര്‍ജ ഷെയ്‌ക്കിന് നല്‍കിയ ആദര ചടങ്ങിന്റെ സംഘാടക യായിരുന്നു സ്വപ്ന.. 5 ദിവസത്തെ പരിപാടിയില്‍ സ്വപ്ന സാന്നിധ്യമുണ്ടായിരുന്നു. ലോക കേരളസഭയുടെ നടത്തിപ്പിലും പ്രതിനിധികളെ തീരുമാനിക്കുന്നതിലും സ്വപ്നന കരങ്ങളുണ്ടായിരുന്നു. സ്പീക്കര്‍ ശ്രീരാമകൃഷണനുമായുള്ള സൗഹൃദമാണ് ഇതിന് ഇടയാക്കിയത്. സി പി എം – പ്രവാസി ബന്ധം ശക്തമാക്കുന്നതിലും സ്വപ്ന പങ്കുവഹിച്ചു. ലോക കേരളസഭ നടന്നത് മുഖ്യ മന്ത്രിക്കറിയില്ലെന്നാണോ.
സംസ്ഥാന മന്ത്രിസഭയിലെ ചില അംഗങ്ങള്‍, ജനപ്രതിനിധികള്‍, സിപിഎം നേതാക്കള്‍ എന്നിവര്‍ക്ക് സ്വര്‍ണ്ണക്കടത്തിലെ മുഖ്യപ്രതിക്ക് അടുത്ത ബന്ധമുണ്ട്.പ്രതികള്‍ക്കനുകൂലമായി ഇടപെട്ടുവെന്ന ആരോപണത്തെത്തുടര്‍ന്ന് മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറി സ്ഥാനത്ത് നിന്ന് ശിവശങ്കരനെ മാറ്റിയ മുഖ്യമന്ത്രി ഐ ടി സെക്രട്ടറി സ്ഥാനത്ത് നിന്ന് മാറ്റാത്തതെന്തെന്ന് വ്യക്തമാക്കണം. മുഖ്യമന്ത്രിയുടെ വ്യക്തിതാല്‍പര്യമാണിതിന് പിന്നില്‍. മുഖ്യമന്ത്രിയുടെ മകളുടെ വ്യവസായ വിശദാംശങ്ങള്‍ പുറത്തു വരുമെന്നതിനാലാണോ ഐടി വകുപ്പില്‍ നിന്ന് മാറ്റാത്തത് സുരേന്ദ്രന്‍ ചോദിച്ചു.
