ജില്ലയില്‍ തുടര്‍ച്ചയായ രണ്ടാം ദിവസവും ആറ് പേര്‍ക്ക് കൊറോണ; രോഗം സ്ഥിരീകരിച്ചവരില്‍ രണ്ട് വയസുകാരിയും

ഇടുക്കി: ജില്ലയില്‍ 6 പേര്‍ക്ക് കൂടി കൊറോണ സ്ഥിരീകരിച്ചതായി ജില്ലാ കളക്ടര്‍ അറിയിച്ചു. തുടര്‍ച്ചയായ രണ്ടാം ദിവസമാണ് ഇത്തരത്തില്‍ ആറ് പേര്‍ക്ക് രോഗം കണ്ടെത്തുന്നത്. രോഗം സ്ഥിരീകരിച്ചവരില്‍ രണ്ട് വയസുകാരിയും.  

അതേ സമയം ഒരാള്‍ക്ക് രോഗം ഭേദമായി, ഇതോടെ നിലവില്‍ ചികിത്സയിലുള്ളവരുടെ എണ്ണം 56 ആയി ഉയര്‍ന്നു. ഇതില്‍ നാല് പേര്‍ കോട്ടയം മെഡിക്കല്‍ കോളേജിലാണ് ചികിത്സയിലുള്ളത്. ആകെ 133 പേര്‍ക്ക് രോഗം സ്ഥിരീകരിച്ചപ്പോള്‍ 77 പേര്‍ക്ക് ഭേദമായി.  

ഇന്നലെ രോഗം സ്ഥിരീകരിച്ചവരുടെ വിവരങ്ങള്‍:  

1&2. ജൂണ്‍ 22ന് ന്യൂദല്‍ഹിയില്‍ നിന്നെത്തിയ തൊടുപുഴ സ്വദേശികളായ അമ്മയും(34) രണ്ട് വയസുള്ള മകളും. കൊച്ചിയില്‍ നിന്നും ടാക്‌സിയില്‍ വീട്ടിലെത്തി നിരീക്ഷണത്തിലായിരുന്നു.  

3. ജൂണ്‍ 27ന് അബുദാബിയില്‍ നിന്നും വിമാനത്തില്‍ തിരുവനന്തപുരത്ത് എത്തിയ മറയൂര്‍ സ്വദേശിയായ 29 കാരന്‍. ടാക്‌സിയില്‍ മറയൂര്‍ കോവില്‍കടവില്‍ എത്തി വീട്ടില്‍ നിരീക്ഷണത്തില്‍ ആയിരുന്നു.  

4&5. ജൂണ്‍ 24ന് തമിഴ്‌നാട് നിന്നും വന്ന സഹോദരങ്ങളായ പാമ്പാടുംപാറ സ്വദേശികള്‍(17, 18). അച്ഛനോടൊപ്പം ഇരുവരും സ്വന്തം കാറില്‍ തേനിയില്‍ നിന്നും വീട്ടിലെത്തി നിരീക്ഷണത്തില്‍ ആയിരുന്നു.  

6. ജൂണ്‍ 30ന് ബാംഗ്ലൂരില്‍ നിന്നും വന്ന ഇരട്ടയാര്‍ സ്വദേശിയായ 29കാരന്‍. ബാംഗ്ലൂരില്‍ ജോലി ആവശ്യത്തിന് പോയ ഇദ്ദേഹത്തിന്റെ ടീമിലെ ഒരാള്‍ക്ക് രോഗം സ്ഥിരീകരിച്ചതിനെ തുടര്‍ന്ന് 13 പേരടങ്ങുന്ന സംഘം ട്രാവലറില്‍ പാലക്കാട് എത്തി. അവിടുന്ന് ബൈക്കിന് ആലപ്പുഴ സ്വദേശിയെ അവിടെ ആക്കിയ ശേഷം നെടുങ്കണ്ടത്ത് കൊറോണ സെന്ററില്‍ നിരീക്ഷണത്തില്‍ ആയിരുന്നു.  

വീടുകളിലും സ്ഥാപനങ്ങളിലുമായി 4100 പേരാണ് നിരീക്ഷണത്തിലുള്ളത്. ആകെ 11413 പേരുടെ സ്രവ സാമ്പിളുകള്‍ പരിശോധനക്ക് അയച്ചു. ഇന്നലെ മാത്രം 306 പേരുടെ ഫലം വന്നപ്പോള്‍ ഇനി ലഭിക്കാനുള്ളത് 137 പേരുടെയാണ്. സൗദി അറേബ്യയിലെ ദമാമില്‍ നിന്ന് ജൂണ്‍ 11ന് എത്തിയ കൊടിക്കുളം സ്വദേശിക്കാണ് ഫലം നെഗറ്റീവായത്. 28ന് ആയിരുന്നു ഇയാള്‍ക്ക് രോഗം സ്ഥിരീകരിച്ചത്.

7 മുതല്‍ രാത്രി 9 വരെ മാത്രം

ഇടുക്കി: ജില്ലയില്‍ വ്യാപാരശാലകളുടെ പ്രവര്‍ത്തന സമയം രാവിലെ ഏഴു മുതല്‍ രാത്രി ഒമ്പതു വരെയാണെന്ന് ജില്ലാ പോലീസ് മേധാവി ആര്‍. കറുപ്പസ്വാമി അറിയിച്ചു. ഈ സമയക്രമത്തില്‍ തുറക്കുകയും അടയ്‌ക്കുകയും ചെയ്യണം. ഇന്നലെ രാവിലെ ഏഴിന് മുമ്പ് കടകള്‍ തുറന്നതിന് 13 ഉടമകള്‍ക്കെതിരെ കേസെടുത്തതായി അറിയിച്ചു. തൊടുപുഴയില്‍ വിവിധ സ്ഥലങ്ങളില്‍ ഇപ്പോഴും രാത്രി വൈകി ഹോട്ടലുകളും പച്ചക്കറി കടകളും പ്രവര്‍ത്തിക്കുന്നുണ്ട്. വെങ്ങല്ലൂര്‍, പട്ടയംകവല മേഖലകളിലാണ് ഇത്തരത്തില്‍ കടകള്‍ തുറക്കുന്നത്.