കോഴിക്കോട്: കോഴിക്കോട്ട് ജ്വല്ലറിയില് തീപിടിത്തം. പൊറ്റമ്മലിനു സമീപം പട്ടേരിയില് പുതുതായി ആരംഭിച്ച അപ്പോളോ ഗോള്ഡ് ഷോറൂമിലാണ് ഇന്നലെ ഉച്ചയ്ക്ക് പന്ത്രണ്ടോടെ തീപിടിത്തമുണ്ടായത്. ആര്ക്കും പരിക്കില്ല.
കെട്ടിടത്തിന്റെ ബേസ്മെന്റില് പാര്ക്ക് ചെയ്തിരുന്ന 22 ബൈക്കുകള്, മൂന്നു കാറുകള്, ഒരു ഓട്ടോറിക്ഷ എന്നിവ കത്തി നശിച്ചു. ഒരു കോടി രൂപയുടെ നഷ്ടം കണക്കാക്കുന്നു. കെട്ടിടത്തിന്റെ ബേസ്മെന്റില് നിന്ന് പുക ഉയരുന്നത് സിസിടിവിയിലൂടെ ശ്രദ്ധയില്പ്പെട്ട ജീവനക്കാര് കെട്ടിടത്തിനുള്ളിലുള്ളവരോട് പുറത്തിറങ്ങാന് ആവശ്യപ്പെടുകയായിരുന്നു.
സ്ത്രീകളടക്കമുള്ള 12 ജീവനക്കാരും ഈ സമയത്ത് ഷോറൂമില് ഉണ്ടായിരുന്നു. വലിയ രീതിയില് കറുത്ത പുക ഉയര്ന്നതോടെ ചിലര് പുറത്തേക്കോടി രക്ഷപ്പെട്ടു. ഒന്നും രണ്ടും നിലകളില് അകപ്പെട്ടവരെ ജനല്ചില്ലുകള് തകര്ത്ത് ഫയര്ഫോഴ്സും മറ്റു ജീവനക്കാരും ചേര്ന്ന് കോണി വഴി പുറത്തേക്ക് ഇറക്കുകയായിരുന്നു.
