ശ്രീനഗര്‍: കശ്മീരില്‍ ഭീകരരെ ലക്ഷ്യമിട്ട് ഇന്ത്യന്‍ സൈന്യത്തിന്റെ മിന്നലാക്രമണം. ഷോപ്പിയാനിലെ പിന്‍ജോര മേഖലയിലാണ് ഏറ്റുമുട്ടല്‍ തുടരുന്നത്. ഇതുവരെ നാലു തീവ്രവാദികളെ വധിച്ചിട്ടുണ്ട്. ഇന്നു പുലര്‍ച്ചെ ആരംഭിച്ച ഓപ്പറേഷന്റെ ഭാഗമായി വന്‍ ഏറ്റുമുട്ടലാണ് നടക്കുന്നതെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഭീകരര്‍ ഒളിച്ചുകഴിയുന്നു എന്ന വിവരത്തെ തുടര്‍ന്ന് നടത്തിയ തെരച്ചില്‍ ഏറ്റുമുട്ടലിലേക്ക് വഴിമാറുകയായിരുന്നു. അതേസമയം, അതിര്‍ത്തിയില്‍ പാക്കിസ്ഥാന്‍ വെടിനിര്‍ത്തല്‍ കരാര്‍ ലംഘിച്ച് ഇന്ത്യന്‍ സൈനിക ക്യാംപുകള്‍ക്ക് നേരേ വെടിയുതിര്‍ത്തു. ഇതിനു കനത്ത തിരിച്ചടിയാണ് ഇന്ത്യന്‍ സേന നല്‍കിയത്.
ഇന്നലെ നടന്ന ഏറ്റുമുട്ടലില്‍ അഞ്ച് തീവ്രവാദികളെ സിആര്‍പിഎഫ് രാഷ്‌ട്രീയ റൈഫിള്‍സ്, സ്‌പെഷല്‍ ഓപ്പറേഷന്‍സ് ഗ്രൂപ്പ് എന്നിവയുടെ സംയുക്ത സേന വധിച്ചിരുന്നു.ഞായറാഴ്ച രാവിലെ മുതല്‍ ആരംഭിച്ച ഓപ്പറേഷന്‍ 12 മണിക്കൂര്‍ നീണ്ടു നിന്നു.
