അഞ്ചല്: ഇടമുളയ്ക്കലില് അമ്മയും അച്ഛനും മരിച്ചതറിയാതെ അമ്മയുടെ മൃതശരീരത്തിനരികെ മുലപ്പാല് നുണഞ്ഞിരുന്ന മൂന്ന് വയസുകാരി കുഞ്ഞ് അശ്വതി നാടിന്റെ നൊമ്പരമായി. ഇടമുളക്കല് അമൃത്ഭവനില് സുനില്(34), സുജിനി(24) എന്നിവരെയാണ് മരിച്ച നിലയില് കണ്ടെത്തിയത്.
സുനില് വീടിന്റെ കഴുക്കോലില് തൂങ്ങിയ നിലയിലും സുജിനി തറയില് പായയില് മരിച്ച നിലയിലുമായിരുന്നു. മരണവിവരം അറിഞ്ഞെത്തിയവര് കണ്ടത് ഇവരുടെ മകളായ മൂന്ന് വയസുകാരി അശ്വതി അമ്മ മരിച്ചതറിയാതെ മുലപ്പാല് നുണയുന്ന കാഴ്ചയായിരുന്നു.
ഇന്നലെ രാവിലെ മരണപ്പെട്ട സുജിനിയുടെ അച്ഛന് വീട്ടിലെത്തി ഏറെ നേരം വിളിച്ചിട്ടും കതകു തുറക്കാത്തതിനെ തുടര്ന്നു ജനല് വെട്ടിപ്പൊളിച്ചപ്പോഴാണ് ഇരുവരുടെയും മൃതദേഹങ്ങള് കണ്ടത്. സുജിനിയെ കഴുത്ത് ഞെരിച്ച് കൊന്ന ശേഷം സുനില് ആത്മഹത്യ ചെയ്തതാണെന്ന പ്രാഥമിക നിഗമനത്തിലാണ് അഞ്ചല് പോലീസ്.
ഫോറന്സിക് സംഘം സ്ഥലത്ത് എത്തി പരിശോധനകള് നടത്തി. കെട്ടിടനിര്മ്മാണ പണിക്കാരനാണ് സുനില്.
ഇയാള്ക്ക് സുജിനിയെ സംശയമായിരുന്നു. മുന്പ് ആലഞ്ചേരിയില് വാടകയ്ക്ക് താമസിച്ചിരുന്ന വീടിന്റെ അയല്വാസിയുമായി സുജിനിക്ക് ബന്ധമുണ്ടെന്ന സംശയമാണ് കൊലപാതകത്തിലേയ്ക്ക് നയിച്ചതെന്ന് കരുതപ്പെടുന്നു. ഇതു സംബന്ധിച്ച് ആത്മഹത്യാക്കുറിപ്പും കണ്ടെടുത്തിട്ടുണ്ട്. ഇയാള്ക്ക് മാനസികമായ തകരാറുണ്ടായിരുന്നതായും പറയപ്പെടുന്നു.
