ചെന്നൈ/പൂനെ: കൊറോണയ്‌ക്കെതിരായ പോരാട്ടത്തില്‍ തമിഴ്‌നാടിനും മഹാരാഷ്ടയ്ക്കും നടന്‍ മോഹന്‍ലാലിന്റെ കൈത്താങ്ങ്. ഇരു സംസ്ഥാനങ്ങളിലും അദ്ദേഹത്തിന്റെ നേതൃത്വത്തിലുള്ള വിശ്വശാന്തി ഫൗണ്ടേഷന്‍ ആയിരം പിപിഇ കിറ്റുകളും രണ്ടായിരം എന്‍95 മാസ്‌കുകളും സംഭാവന ചെയ്തു. ഇന്നലെ തമിഴ്‌നാട് മന്ത്രി എസ്.പി വേലുമണിക്കാണ് സാധനങ്ങള്‍ കൈമാറിയത്. അതേസമയം മഹാരാഷ്‌ട്രയ്‌ക്ക് സഹായമായി നല്‍കിയ കിറ്റുകളും മാസ്‌കുകളും പൂനെ മേയര്‍ മുരളീധര്‍ മഹോളിനാണ് കൈമാറിയത്.
കൊറോണ വലിയ പ്രതിസന്ധി തീര്‍ക്കുന്ന സംസ്ഥനങ്ങളാണ് മഹാരാഷ്‌ട്രയും തമിഴ്‌നാടും. രാജ്യത്തെ ഏറ്റവും കൂടുതല്‍ കൊറോണ രോഗികള്‍ മഹാരാഷ്‌ട്രയിലാണെങ്കില്‍ തമിഴ്‌നാട്ടില്‍ ഇന്നലെ മാത്രം 798 പേര്‍ക്കാണ് രോഗം കണ്ടെത്തിയത്. ഇതോടെ തമിഴ്‌നാട്ടിലെ കൊറോണ രോഗികള്‍ 8002 ആയി. ഒറ്റ ദിവസം ഇത്രയും പേര്‍ക്ക് രോഗം സ്ഥിരീകരിക്കുന്നത് ഇതാദ്യമാണ്. ഇന്നലെ ആറ് പേര്‍ മരിച്ചതോടെ കൊവിഡ് മരണം 53 ആയി. ചെന്നൈയില്‍ മാത്രം 4371 രോഗികളാണുള്ളത്.
