ന്യൂദല്ഹി: കോവിഡിന്റെ പശ്ചാത്തലത്തില് പ്രധാനമന്ത്രി നരേന്ദ്രമോദി ഇന്ന് രാജ്യത്തെ അഭിസംബോധന ചെയ്യും. രാത്രി 8 മണിക്കാണ് അദ്ദേഹം രാജ്യത്തെ അഭിസംബോധന ചെയ്യുന്നത്. ട്വിറ്ററിലൂടെയാണ് ഇക്കാര്യം അറിയിച്ചത്. ലോക്ഡൗണ് നാലാം ഘട്ടത്തിലേക്ക് നീളുമോ എന്നത് സംബന്ധിച്ചുള്ള പ്രഖ്യാപനം അദ്ദേഹം നടത്തിയേക്കും.
നേരത്തെ മുഖ്യമന്ത്രിമാരുമായി നടത്തിയ വീഡിയോ കോണ്ഫറന്സില് ലോക്ഡൗണ് നീട്ടുന്നത് സംബന്ധിച്ചുള്ള സൂചനകള് പുറത്ത് വന്നിരുന്നു.ഘട്ടം ഘട്ടമായി ലോക്ഡൗണ് പിന്വലിച്ചാല് മതിയെന്ന് നിലപാടാണ് കേന്ദ്രം സ്വീകരിച്ചത്. എന്നാല് ചില സംസ്ഥാനങ്ങള് ലോക്ഡൗണ് നീട്ടാന് ആവശ്യപ്പെട്ടതായും അദ്ദേഹം യോഗത്തില് അറിയിച്ചിരുന്നു.
മെയ് 17-നാണ് ലോക്ഡൗണ് മൂന്നാം ഘട്ടം അവസാനിക്കുന്നത്. ലോക്ഡൗണ് വീണ്ടും നീട്ടുകയാണെങ്കില് നിയന്ത്രണങ്ങള് സംസ്ഥാനങ്ങള് തീരുമാനിക്കട്ടെയെന്ന് പ്രധാനമന്ത്രി നരേന്ദ്രമോദി തിങ്കളാഴ്ച വിളിച്ച യോഗത്തില് മുതിര്ന്ന മന്ത്രിമാര്ക്ക് നിര്ദ്ദേശം നല്കിയിരുന്നു.
ഗുരുതരമായി രോഗബാധ റിപ്പോര്ട്ട് ചെയ്ത ഇടങ്ങളല്ലെങ്കില് അവിടെ നിയന്ത്രണങ്ങളില് ഇളവുകള് ഉണ്ടാകും. എന്നാല് റെഡ്, കണ്ടെയ്ന്മെന്റ് സോണുകളില് രാത്രി കര്ഫ്യൂവും പൊതുഗതാഗത നിരോധനവും ഉള്പ്പടെ തുടരാനാണ് സാധ്യത. മെയ് 15-നകം സോണുകള് എങ്ങനെ വേണമെന്ന കൃത്യമായ പട്ടിക കൈമാറാന് പ്രധാനമന്ത്രി മുഖ്യമന്ത്രിമാര്ക്ക് നിര്ദ്ദേശം നല്കിയിട്ടുണ്ട്. ഇത് ലഭിച്ചശേഷമാകും നടപടി സ്വീകരിക്കുക.
