ന്യൂദല്ഹി : കേരളം ലോക്ഡൗണ് നിയന്ത്രണങ്ങള് ലംഘിച്ചെന്ന് ആരോപിച്ച് കേന്ദ്രസര്ക്കാര് കേരളത്തിന് നോട്ടീസ് അയച്ചു. കേന്ദ്രാനുമതി ഇല്ലാതെ ബാര്ബര് ഷോപ്പുകളും റസ്റ്റോറന്റുകളും വര്ക്ക്ഷോപ്പുകളും തുറന്നുപ്രവര്ത്തിക്കാന് കേരളം അനുമതി നല്കിയതിനെതിരെയാണ് നോട്ടീസ്. ഇത് ഗുരുതരമായ ചട്ട ഗുരുതര ലംഘനമാണെന്നും ആഭ്യന്തര സെക്രട്ടറി അജയ് കുമാര് ഭല്ല അയച്ച കത്തില് പറയുന്നുണ്ട്.
കേന്ദ്ര ആഭ്യന്തര മന്ത്രാലയം ചീഫ് സെക്രട്ടറിക്കാണ് കത്ത് കൈമാറിയത്. കത്തില് സംസ്ഥാനം ഉടന് വിശദീകരണം നല്കാനും ആവശ്യപ്പെട്ടിട്ടുണ്ട്. കേന്ദ്രം നല്കിയ മാര്ഗ്ഗരേഖയിലെ വ്യവസ്ഥകള് സംസ്ഥാനം ലംഘിച്ചെന്നും, ആവര്ത്തിക്കരുതെന്ന് താക്കീതും നല്കിയിട്ടുണ്ട്.
മെയ് മൂന്ന് വരെ ലോക്ഡൗണ് കര്ശനമായി തുടരണമെന്നായിരുന്നു കേന്ദ്ര നിര്ദ്ദേശം. എന്നാല് ഏപ്രില് 20 മുതല് സംസ്ഥാന സര്ക്കാര് കേന്ദ്രം പ്രഖ്യാപിക്കാത്ത ചില ഇളവുകള് പ്രഖ്യാപിക്കുകയായിരുന്നു. ഇതിനെതിരെയാണ് നടപടി. കേന്ദ്രത്തിന്റെ അനുമതിയില്ലാതെ സംസ്ഥാനത്തിന് ഈ വിഷയത്തില് ഒറ്റയ്ക്ക് നടപടി സ്വീകരിക്കാന് സാധിക്കില്ലെന്നും റിപ്പോട്ടില് പറയുന്നുണ്ട്.
2005 ലെ ദേശീയ ദുരന്ത നിവാരണ നിയന്ത്രണ നിയമപ്രകാരമാണ് കേന്ദ്രം ലോക്ഡൗണ് പ്രഖ്യാപിച്ചത്. ഏപ്രില് 15ന് ഹോട്ട്സ്പോട്ടുകള് അല്ലാത്ത പ്രദേശങ്ങളില് ചില ഇളവുകള് കേന്ദ്രസര്ക്കാര് പ്രഖ്യാപിച്ചിരുന്നു. എന്നാല് കേന്ദ്രം നല്കിയ മാര്ഗ നിര്ദ്ദേശങ്ങള് കാറ്റില്പറത്തിക്കൊണ്ട് സംസ്ഥാനം കൂടുതല് ഇളവുകള് നല്കുകയായിരുന്നു.
