കാസര്കോട്: വലിപ്പ ചെറുപ്പമില്ലാതെ രാജ്യങ്ങള് കൊവിഡ് 19 ഭീഷണിയില് അതിര്ത്തിക്കുളളില് ഒതുങ്ങിയപ്പോള്, അതിജീവനത്തിന്റെ പുതിയ മാതൃക സൃഷ്ടിക്കുകയാണ് കാസര്കോട്. ജില്ലയില് ഇന്നലെ റിപ്പോര്ട്ട് ചെയ്ത ഒരു പോസറ്റീവ് കേസുള്പ്പെടെ 168 കോവിഡ് രോഗികളില് 107 രോഗികള് രോഗവിമുക്തരായി. അതായത് ആകെ രോഗികളില് 63.69 ശതമാനം പേര് രോഗവിമുക്തി നേടി.
ഇന്നലെ മാത്രം 24 പേരാണ് രോഗവിമുക്തി നേടിയത്. ഇവരുടെ തുടര് പരിശോധന ഫലങ്ങള് നെഗറ്റീവായതോടെ ആശുപത്രി വിടുകയായിരുന്നു. ഇവരില് 16 പേര് കാസര്കോട് ജനറല് ആശുപത്രിയില് നിന്നും അഞ്ചു പേര് കാസര്കോട് മെഡിക്കല് കോളേജില് നിന്നും മൂന്ന് പേര് കാഞ്ഞങ്ങാട് ജില്ലാ ആശുപത്രിയില് നിന്നുമാണ് രോഗമുക്തരായത്.
ഏപ്രില് ആറിന് മാത്രം പ്രവര്ത്തനം ആരംഭിച്ച കാസര്കോട് മെഡിക്കല് കോളജില് നിന്ന് പത്ത് ദിവസത്തിനുള്ളില് അഞ്ചു പേര്ക്ക് രോഗ വിമുക്തി നേടാന് സാധിച്ചത് ജില്ലയ്ക്ക് ചികിത്സാ രംഗത്ത് പുത്തന് പ്രതീക്ഷയാണ് നല്കുന്നത്. തിരുവന്തപുരം ഗവണ്മെന്റ് മെഡിക്കല് കോളേജില് നിന്നുള്ള 27 അംഗ മെഡിക്കല് വിദഗ്ദരാണ് കാസര്കോട് മെഡിക്കല് കോളേജിന്റെ ചികിത്സയ്ക്ക് നേതൃത്വം നല്കിയത്.
മാര്ച്ച് പകുതിയോടെയാണ് കോവിഡിന്റെ രണ്ടാംവരവ് തുടങ്ങിയത്. ഓരോ ദിവസവും ജില്ലയിലെ കോവിഡ് രോഗികളുടെ എണ്ണത്തിന്റെ ഗ്രാഫ് ഉയര്ന്നു വന്നു. രോഗവ്യാപനത്തെ പ്രതിരോധിക്കാന് ശക്തമായ സന്നാഹവുമായി ജില്ലാഭരണകൂടം മുന്നിട്ടിറങ്ങി. ജില്ലയിലെ രോഗബാധിതരില് 70 ശതമാനത്തിലധികവും ദുബായില് നിന്ന് വന്നവരായിരുന്നു. സംസ്ഥാനത്ത് ഏറ്റവും കൂടുതല് കോവിഡ് 19 കേസുകള് റിപ്പോര്ട്ട് ചെയ്തത് കാസര്കോടായിരുന്നു.
സമ്പന്നരാജ്യങ്ങള് പോലും കോവിഡിനെ പിടിച്ചുകെട്ടാന് കഴിയാതെ വലയുമ്പോഴാണ് കൊച്ചുകേരളത്തിലെ ഏറ്റവും വടക്കേ അറ്റത്തുള്ള കാസര്കോട് ജില്ല മഹാമാരിയെ ധീരമായി പ്രതിരോധിച്ചത് എന്നു കൂട്ടിവായിക്കുമ്പോഴേ, ഈ അതിജീവന ദൗത്യത്തിന്റെ മൂല്യം അറിയൂ.
