ന്യൂദല്‍ഹി: കൊറോണ പ്രതിരോധ പ്രവര്‍ത്തനങ്ങള്‍ക്ക് സഹകരണം തേടുന്നതിനായി പ്രധാനമന്ത്രി നരേന്ദ്ര മോദി ചാനല്‍ മേധാവികളുമായി ചര്‍ച്ച നടത്തി. രാജ്യത്തെ 12 മാധ്യമങ്ങളുടെ മേധാവികളുമായാണ് ഇന്നലെ ഉച്ചയ്‌ക്ക് വീഡിയോ കോണ്‍ഫറന്‍സിങ് വഴി ചര്‍ച്ച നടത്തിയത്. പ്രതിരോധ ബോധവത്കരണ പ്രവര്‍ത്തനങ്ങളില്‍ മാധ്യമങ്ങളുടെ പങ്കാളിത്തവും ജാഗ്രതയും ആവശ്യപ്പെട്ടായിരുന്നു ചര്‍ച്ച നടത്തിയത്.
രോഗത്തെ ചെറുക്കുന്നതിനായി സര്‍ക്കാര്‍ എടുക്കുന്ന മുന്‍കരുതല്‍ നടപടികള്‍ ജനങ്ങളിലേക്ക് എത്തിക്കാന്‍ മാധ്യമങ്ങളുടെ ഭാഗത്ത് നിന്നും പൂര്‍ണ പിന്തുണ ഉണ്ടായിരിക്കണമെന്ന് പ്രധാനമന്ത്രി ചാനല്‍ മേധവികളോട് ആവശ്യപ്പെട്ടു. ഇതോടൊപ്പം കൊറോണ പ്രതിരോധ പ്രവര്‍ത്തനങ്ങളിലും രാജ്യത്ത് നടക്കുന്ന വിവരങ്ങള്‍ ഉടനടി ജനങ്ങളിലേക്ക് എത്തിക്കുന്നതില്‍ മാധ്യമങ്ങള്‍ കാണിക്കുന്ന ജാഗ്രതയിലും പ്രധാനമന്ത്രി സംതൃപ്തി രേഖപ്പെടുത്തി. നാളിത് വരെ ക്രിയാത്മകമായ ഇടപെടലുകളാണ് രാജ്യത്തെ മാധ്യമങ്ങളുടെ ഭാഗത്ത് നിന്നും ഉണ്ടായിട്ടുള്ളതെന്നും അദ്ദേഹം പറഞ്ഞു. വ്യവസായ പ്രമുഖരുമായും പ്രധാനമന്ത്രി വീഡിയോകോണ്‍ഫറന്‍സ് വഴി സംസാരിച്ചു.
