ബീജിങ്: പുതുതായി റിപ്പോര്‍ട്ട് ചെയ്യുന്ന കൊറോണ വൈറസ് രോഗികളുടെ എണ്ണത്തില്‍ തുടര്‍ച്ചയായ മൂന്നാം ദിവസവും കുറവുണ്ടെന്ന് ചൈന. രോഗം പടരുന്നത് തടയാന്‍ സ്വീകരിച്ച നിയന്ത്രണ നടപടികള്‍ ഫലം കാണുന്നതായി ദേശീയ ആരോഗ്യ കമ്മീഷന്‍ വക്താവ് മി ഫെങ് പറഞ്ഞു.
ജനുവരി 23 മുതല്‍ വുഹാനിലെ വിദ്യാലയങ്ങളും ഓഫീസും ഫാക്ടറികളും വീടുകളുമടക്കം അടച്ചിട്ടിരിക്കുകയാണ്. അനുമതിയില്ലാതെ വീടിനു പുറത്തിറങ്ങുന്നവരെ അറസ്റ്റ് ചെയ്യാനും നിര്‍ദേശമുണ്ട്. ഈ നിയന്ത്രണങ്ങള്‍ വഴി രോഗം പടരുന്നത് തടയാനായെന്നാണ് ചൈന പറയുന്നത്.
അതേസമയം, ഞായറാഴ്ച വരെ മരണം 1665 ആയി. 2009 പേര്‍ക്കാണ് പുതുതായി കൊറോണ സ്ഥിരീകരിച്ചത്. ഇതോടെ ആകെ രോഗികളുടെ എണ്ണം 68,500 ആയി. ഗുരുതരാവസ്ഥയിലുള്ള രോഗികളുടെ എണ്ണം 32.4 ശതമാനത്തില്‍ നിന്ന് 21.6 ശതമാനമായി കുറഞ്ഞെന്നും മി ഫെങ് പറഞ്ഞു. രോഗം ഭേദമാകുന്നവരുടെ എണ്ണത്തില്‍ ഗണ്യമായ വര്‍ധനയുണ്ടെന്ന് ചൈനീസ് വിദേശകാര്യ മന്ത്രി വാങ് യി പറഞ്ഞു. ചൈനയ്‌ക്ക് പുറത്ത് മുപ്പത് രാജ്യങ്ങളിലായി 500 പേര്‍ക്ക് കൊറോണ സ്ഥിരീകരിച്ചു. നാല് പേര്‍ക്ക് ജീവന്‍ നഷ്ടമായി.
ചൈനയെ സഹായിക്കും: ഇന്ത്യന്‍ സ്ഥാനപതി
ബീജിങ്: കൊറോണ വൈറസ് പ്രതിരോധത്തിന് ചൈനയ്‌ക്ക് ആവശ്യമായ മരുന്നുകളും ചികിത്സാ സഹായങ്ങളും നല്‍കുമെന്ന് ചൈനയിലെ ഇന്ത്യന്‍ സ്ഥാനപതി വിക്രം മിസ്രി. ഇന്ത്യയും ചൈനയും തമ്മിലുള്ള സൗഹൃദവും ഐക്യവുമാണ് ഇതിലൂടെ പ്രകടമാകുന്നതെന്നും ട്വിറ്ററില്‍ പോസ്റ്റ് ചെയ്ത വീഡിയോ സന്ദേശത്തില്‍ അദ്ദേഹം പറഞ്ഞു.ഇന്ത്യയും കൊറോണ ഭീഷണി നേരിടുകയാണ്. ജനങ്ങളുടെ ക്ഷേമത്തിന് വേണ്ടതെല്ലാം ഇന്ത്യ ചെയ്യുന്നു. അതോടൊപ്പം ചൈനയെ സഹായിക്കാനാകുന്നതെല്ലാം ചെയ്യുന്നുമുണ്ട്.
കൊറോണ ഏറ്റവുമധികം ബാധിച്ച ഹുബയ് പ്രവിശ്യയിലും വുഹാന്‍ നഗരത്തിലുമുള്ളവര്‍ക്ക് എല്ലാ സഹായവും ഇന്ത്യ നല്‍കും, മിസ്രി പറഞ്ഞു.
