തിരുവല്ല: സംഘകാര്യാലയം സമാജത്തിന് ആശ്രയ കേന്ദ്രമാകണമെന്നും സംഘം രാഷ്ട്രത്തിന്റെ ഭരണ സംവിധാനത്തെ രൂപീകരിക്കാന് വേണ്ടിയുള്ള പ്രസ്ഥാനമല്ലെന്നും ആര്എസ്എസ് അഖില ഭാരതീയ കാര്യകാരി സദസ്യന് എസ്. സേതുമാധവന്. തിരുവല്ല ഖണ്ഡ് കാര്യാലയത്തിന്റെ സമര്പ്പണ ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. സംഘം ഒരു വിശേഷ സംഘടനയാണ്. വ്യക്തികളെ നിര്മ്മിക്കുന്ന പ്രവര്ത്തനമാണ് സംഘം ചെയ്യുന്നത്. സംഘം ഒരു പവര് ഹൗസ് ആയിരിക്കണം. ആവശ്യമായ വെളിച്ചവും കാറ്റും എല്ലാം ഒരേ പവര് ഉപയോഗിച്ച് വ്യത്യസ്ത രീതിയില് എത്തിക്കുന്നതു പോലെ സമാജത്തിന് ആവശ്യമായ കാര്യങ്ങള് എന്താണോ അത് മനസ്സിലാക്കി എത്തിക്കുക അല്ലെങ്കില് പരിഹരിക്കുക എന്നത് സംഘപ്രവര്ത്തനത്തിന്റെ ഫലമായി മാറണം. ഇതിനനുസരിച്ചാണ് സംഘത്തില് ഗതിവിധികള് രൂപം കൊണ്ടത്.
ഗോ ആധാരിത കൃഷി ചെയ്ത് ഭൂമിയെ ഫലഭൂയിഷ്ടമാക്കി നിലനിര്ത്തുന്ന തരത്തിലേക്ക് മാറ്റുവാന് ഗോസേവയും ജാതീയത ഇല്ലായ്മ ചെയ്യാന് സാമാജിക സമരസതയും സമാജത്തില് സാംസ്കാരിക മൂല്യങ്ങള് ഉയര്ത്തുന്നതിന് ധര്മ്മജാഗരണും കുടുബ സങ്കല്്പത്തിനെ ഊട്ടിയുറപ്പിച്ച് കുടുംബ ബന്ധങ്ങളെ നിലനിര്ത്തുന്നതിന് കുടുംബ പ്രബോധനും പരിസ്ഥിതി സംരക്ഷണത്തെ പ്രോത്സാഹിപ്പിക്കാന് പര്യാവരണും ഗ്രാമങ്ങളുടെ ഉന്നമനത്തിന് ഗ്രാമവികാസം തുടങ്ങിയ ഗതിവിധികള് ഇന്ന് സമാജത്തിനാവശ്യമുള്ളവയെ പരിപോഷിപ്പിക്കുന്നതിനു വേണ്ടി രൂപം കൊണ്ടിട്ടുള്ളതാണ്. ഈ കാര്യാലയവും നാടിനു വേണ്ടി സമര്പ്പിക്കുമ്പോള് സമാജത്തിന് ആശയും ആശ്രയവുമായി മാറണം എന്ന് പ്രാര്ത്ഥിക്കുന്നുവെന്നും അദ്ദേഹം പറഞ്ഞു.
ഖണ്ഡ് സംഘചാലക് ഡി. പ്രസന്നകുമാര് അധ്യക്ഷനായി. ജില്ലയിലെ മുതിര്ന്ന സ്വയംസേവകന് അഡ്വ. പി.കെ. വിഷ്ണു നമ്പൂതിരിയെ മുന് മിസോറാം ഗവര്ണ്ണര് കുമ്മനം രാജശേഖരന് പൊന്നാട അണിയിച്ച് ആദരിച്ചു. വിഭാഗ് സംഘചാലക് സി.പി. മോഹനചന്ദ്രന്, ശബരിഗിരി ജില്ലാ സംഘചാലക് ഉപാസന നാരായണന് എന്നിവര് ഉപഹാര സമര്പ്പണം നിര്വ്വഹിച്ചു. സ്വാമി നിര്വിണ്ണാനന്ദ മഹരാജ്, ബ്രഹ്മചാരിണി ഭവ്യാമൃത ചൈതന്യ, അക്കീരമണ് കാളിദാസ ഭട്ടതിരിപ്പാട് എന്നിവര് അനുഗ്രഹ പ്രഭാഷണം നടത്തി. അഡ്വ. എസ്.എന്. ഹരികൃഷ്ണന്, ബൈജുലാല്, കെ.ആര്. രതീഷ്, എം.എന്. മഹേഷ് എന്നിവര് പ്രസംഗിച്ചു.
