തിരുവനന്തപുരം: ഇഷ്ടക്കാരെ വൈസ് ചാന്സലര് സ്ഥാനത്തേക്ക് തിരുകി കയറ്റാനുള്ള പിണറായി സര്ക്കാരിന്റെ ശ്രമത്തിന് തിരിച്ചടി നല്കി ഗവര്ണര് ആരിഫ് മുഹമ്മദ് ഖാന്. സര്ക്കാരിന്റെ നിര്ദേശം മറികടന്ന് ആരോഗ്യസര്വകലാശാലാ വൈസ് ചാന്സലര് സ്ഥാനത്തേക്ക് ആരോഗ്യ സര്വകലാശാല ഗവേണിങ് കൗണ്സില് അംഗവും മെഡിസിന് ഡീനുമായ ഡോ. മോഹനന് കുന്നുമ്മലിനെ നിയമിച്ചു. ഡോ. എം.കെ.സി. നായര് വിരമിക്കുന്ന ഒഴിവിലാണ് പുതിയ നിയമനം.
ചാന്സലര് സ്ഥാനത്തേക്ക് മൂന്നുപേരുകളാണ് ഡോ. ബി. ഇക്ബാല് അധ്യക്ഷനായ സെര്ച്ച് കമ്മിറ്റി സമര്പ്പിച്ചിരുന്നത്. ഡോ. പ്രവീണ്ലാല് കുറ്റിച്ചിറ, ഡോ. വി. രാമന്കുട്ടി , ഡോ. മോഹനന് കുന്നുമ്മല് എന്നിവരായിരുന്നു പട്ടികയിലുണ്ടായിരുന്നവര്. മുന് മഡിക്കല് വിദ്യാഭ്യാസ ഡയറക്ടറും തൃശ്ശൂര് ജൂബിലി മിഷന് മെഡിക്കല് കോളേജ് പ്രൊഫസറുമായ ഡോ. പ്രവീണ്ലാല് കുറ്റിച്ചിറയെ അല്ലെങ്കില് ഡോ. വി. രാമന്കുട്ടിയെ നിയമിക്കാനാണ് സര്ക്കാരും സിപിഎമ്മും നിര്ദേശിച്ചത്. എന്നാല് ചാന്സിലറായ ഗവര്ണര് ഇത് തള്ളുകയായിരുന്നു.
സര്ക്കാര് നിര്ദേശിച്ച ഡോ. വി. രാമന്കുട്ടി മുന് മുഖ്യമന്ത്രി സി. അച്യുതമേനോന്റെ മകനും അച്യുതമേനോന് സെന്റര് ഫോര് ഹെല്ത്ത് സയന്സ് സ്റ്റഡീസ് സീനിയര് ഗ്രേഡ് പ്രൊഫസറുമായിരുന്നു. സര്ക്കാരിന്റേത് ബന്ധുനിയമനമാണെന്ന് അറിഞ്ഞു കൊണ്ട്് ഗവര്ണര് പേര് തള്ളി പട്ടികയില് മൂന്നാമനായ ഡോ. മോഹനനെ ഗവര്ണര് നിയമിച്ചത്. തൃശ്ശൂര് മെഡിക്കല് കോളേജ് റേഡിയോ ഡയഗ്നോസിസ് വിഭാഗത്തില് ദീര്ഘകാലം അധ്യാപകനായിരുന്ന ഡോ. മോഹനന് 2016ല് മഞ്ചേരി സര്ക്കാര് മെഡിക്കല് കോളേജില് പ്രിന്സിപ്പലായി. വിരമിച്ചശേഷം പെരിന്തല്മണ്ണ എം.ഇ.എസ്. മെഡിക്കല് കോളേജ് റേഡിയോ ഡയഗ്നോസിസ് വിഭാഗം മേധാവിയായി പ്രവര്ത്തിക്കുകയാണ്. ഗവണ്മെന്റ് മെഡിക്കല് കോളേജ് അധ്യാപക സംഘടനാ സംസ്ഥാന പ്രസിഡന്റായിരുന്നു. നാഷണല് റേഡിയോളജിക്കല് ആന്ഡ് ഇമേജിങ് അസോസിയേഷന് പ്രസിഡന്റായും പ്രവര്ത്തിച്ചിട്ടുണ്ട്. മെഡിക്കല് കൗണ്സില് ഓഫ് ഇന്ത്യ, ട്രാവന്കൂര് കൊച്ചിന് മെഡിക്കല് കൗണ്സില് എന്നിവയിലും അംഗമായിരുന്നു. 2016-ല് സംസ്ഥാന സര്ക്കാരിന്റെ മികച്ച ഡോക്ടര്ക്കുള്ള പുരസ്കാരം ഉള്പ്പെടെയുള്ള അംഗീകാരങ്ങള് ലഭിച്ചിട്ടുണ്ട്. ഡോ. മോഹനന് കുന്നുമ്മല് കണ്ണൂര് സ്വദേശിയാണ്. വര്ഷങ്ങളായി തൃശൂര് ചെമ്പൂക്കാവിലാണ് താമസം. തൃശൂര് ഗവ. മെഡിക്കല് കോളജ് ആശുപത്രിയിലെ കുട്ടികളുടെ വിഭാഗം ഡോക്ടറായ പാര്വതിയാണ് ഭാര്യ. എം.ജി.ആര്. മെഡിക്കല് യൂണിവേഴ്സിറ്റി മുന് വൈസ്ചാന്സലര് ഡോ. മയില് വാഹനന്, യു.ജി.സി. മുന് ചെയര്മാന് ഡോ. ഹരി ഗൗതം എന്നിവരായിരുന്നു സെര്ച്ച് കമ്മിറ്റിയിലെ മറ്റ് അംഗങ്ങള്
