തിരുവനന്തപുരം: കോഴിക്കോട് കൂടത്തായിയില്‍ കേരളത്തെ ഞെട്ടിക്കുന്ന കൊലപാതക പരമ്പരയുടെ ചുരുളഴിയവേ വീണ്ടും അതേ മോഡല്‍ കൊലപാതക പരമ്പരയുടെ കഥ തിരുവനന്തപുരത്ത് നിന്നും. കരമന കാലടി കൂടത്തില്‍ കുടുംബത്തിലെ ഏഴു പേരാണ് ഒന്നിനു പിന്നാലെ ഒന്നായി മരിച്ചത്. നഗരത്തില്‍ വന്‍ ഭൂസ്വത്തിന് ഉടമകള്‍ കൂടിയാണ് കൂടത്തില്‍ കുടുംബം. ഗോപിനാഥന്‍ നായര്‍, ഭാര്യ സുമുഖിഅമ്മ, മക്കളായ ജയശ്രീ, ജയബാലകൃഷ്ണന്‍, ജയപ്രകാശ്, ഗോപിനാഥന്‍ നായരുടെ സഹോദരന്‍ വേലുപ്പിള്ളയുടെ മകന്‍ ഉണ്ണികൃഷ്ണന്‍ നായര്‍, ഗോപിനാഥന്‍ നായരുടെ മറ്റൊരു സഹോദരനായ നാരായണപിള്ളയുടെ മകന്‍ ജയമാധവന്‍ എന്നിവരാണ് മരിച്ചത്. ഈ കൊലപതാകങ്ങളില്‍ അന്വേഷണം ആവശ്യപ്പെട്ടത് പൊതുപ്രവര്‍ത്തകനായ ആര്‍.അനില്‍കുമാറാണ്. കുടുംബത്തില്‍ നടന്നത് കൊലപാതകങ്ങള്‍ ആണെന്നും 50 കോടിയുടെ സ്വത്ത് തട്ടിയെടുക്കാനെന്നുമാണ് പരാതി.
ദുരൂഹ മരണങ്ങളില്‍ കുടുംബത്തിലെ കാര്യസ്ഥന് പങ്കെന്നും ആരോപണമുണ്ട്. അതിനാല്‍, അനന്തരാവകാശികള്‍ ഇല്ലാത്തതിനാല്‍ സ്വത്തുക്കള്‍ സര്‍ക്കാരിലേക്ക് കണ്ടുകെട്ടണം എന്നായിരുന്നു പരാതിയിലെ ആവശ്യം.
എന്നാല്‍, ഈ പരാതി അന്വേഷിക്കവേയാണ് ഞെട്ടിക്കുന്ന ചില വിവരങ്ങള്‍ ക്രൈംബ്രാഞ്ചിന് ലഭിച്ചത്. മരണങ്ങളില്‍ ദുരൂഹതയും പോലീസ് കണ്ടെത്തി. തിരുവനന്തപുരം നഗരത്തിന്റെ കണ്ണായ ഇടങ്ങളില്‍ കോടികളുടെ വസ്തുവക യുള്ള കുടുംബമായിരുന്നു കാലടിയിലെ ‘കൂടത്തില്‍’ കുടുംബം. ഒന്നൊഴിയാതെ എല്ലാവരും മരിച്ചു. ഒരേ ലക്ഷണങ്ങളോടെ ഇവര്‍ മരിച്ചതെന്നും കണ്ടെത്തി. പരാതി അന്വേഷിക്കവേ പ്രഥമദൃഷ്ട്യാ തന്നെ പൊലീസിന് മനസ്സിലായി സ്വത്തുക്കള്‍ക്ക് അനന്തരാവകാശികള്‍ ഇല്ലെന്ന്. അതിനാല്‍ തന്നെ വില്‍പത്രത്തില്‍ പേരുള്ള രവീന്ദ്രന്‍ നായരെന്ന കോടതി ഗുമസ്തന്‍ പോലീസിന്റെ നിരീക്ഷണത്തിലായി. സ്വത്തുക്കള്‍ ഇപ്പോള്‍ വച്ചനുഭവിക്കന്നവരില്‍ ആരും മരിച്ചവരുമായി രക്തബന്ധമോ അടുപ്പമോ ഇല്ലാത്തവരാണെന്നും പോലീസ് കണ്ടെത്തി.
അന്വേഷണം പുരോഗമിക്കവേ അന്വേഷണ ഉദ്യോഗസ്ഥരുടെ മേല്‍ വന്‍ സമ്മര്‍ദ്ദവുമുണ്ടായി. ഇതിനിടെ വിശദമായ അന്വേഷണത്തിലേക്കും അറസ്റ്റിലേക്കും നീങ്ങുന്നതിനിടെ കാര്യങ്ങള്‍ മരവിച്ച അവസ്ഥയിലായി. രണ്ടുവര്‍ഷത്തിനു ശേഷം കുടുംബത്തിലെ അകന്ന ബന്ധു പ്രസന്നകുമാരിയുടെ പരാതിയില്‍ മേല്‍ മുഖ്യമന്ത്രിയുടെ അന്വേഷണ പ്രകാരം കരമന പോലീസ് വീണ്ടും കേസ് അന്വേഷണം ഊര്‍ജിതമാക്കിയിരിക്കുകയാണ്. ഇപ്പോള്‍ കൂടത്തില്‍ കുടുംബത്തിന്റെ സ്വത്തുക്കള്‍ അനുഭവിക്കുന്നവര്‍ക്ക് കുടുംബത്തിലെ ദുരൂഹമരണങ്ങളില്‍ പങ്കുണ്ടോ എന്നത് കൂടുതല്‍ അന്വേഷണത്തിലൂടെ മാത്രമേ വ്യക്തമാകൂ. അങ്ങനെയെങ്കില്‍ അതു കേരളത്തെ ഞെട്ടിക്കുന്ന അടുത്ത കൊലപാതക പരമ്പരയിലേക്ക് വഴിമാറും.
