പെരുന്ന: സാമുദായിക സ്വാധീനം ഉപയോഗിച്ച് യുഡിഎഫിന് വേണ്ടി വോട്ടു പിടിച്ചുവെന്ന ആരോപണം അടിസ്ഥാന രഹിതമെന്ന് എന്‍എസ്എസ്. വിശ്വാസ സംരക്ഷണത്തിനും മുന്നാക്ക വിഭാഗങ്ങള്‍ക്ക് നീതി ലഭിക്കുന്നതിനും വേണ്ടിയാണ് ശരിദൂരം കണ്ടെത്തണമെന്ന് എന്‍എസ്എസിന് പറയേണ്ടി വന്നത്. ഇത് നാടിന്റെ നന്മയ്‌ക്ക് വേണ്ടിയായിരുന്നു. ഇക്കാര്യത്തില്‍ പ്രത്യേക അവകാശവാദമോ ആശങ്കയോ എന്‍എസ്എസിനില്ലെന്നും ജനറല്‍ സെക്രട്ടറി ജി. സുകുമാരന്‍ നായര്‍ ഇന്ന് പുറത്തിറക്കിയ വാര്‍ത്താക്കുറിപ്പില്‍ പറഞ്ഞു.
ഉപതെരഞ്ഞെടുപ്പുകളുടെ ഫലം എന്തു തന്നെയായാലും ശരിദൂരമാണ് ശരിയെന്ന് കാലം തെളിയിക്കുമെന്ന കാര്യത്തില്‍ സംശയമില്ല. അവിടെ രാഷ്‌ട്രീയത്തിനോ സമുദായത്തിനോ ആയിരിക്കില്ല, സാമൂഹിക നീതിക്കായിരിക്കും പ്രധാന്യം. ശരിദൂരമാണെങ്കിലും എന്‍എസ്എസ് പ്രവര്‍ത്തകര്‍ക്ക് അവര്‍ക്കിഷ്ടമുള്ള നിലപാടുകള്‍ സ്വീകരിക്കുന്നതിനോ പ്രകരിപ്പിക്കുന്നതിനോ യാതൊരു വിലക്കും ഏര്‍പ്പെടുത്തിയിരുന്നില്ല. എന്നാല്‍ ചില മാധ്യമങ്ങള്‍ എന്‍എസ്എസിനെ കാര്യമറിയാതെ വിമര്‍ശിക്കുകയായിരുന്നു. വിശ്വാസ സംരക്ഷണത്തിന്റെ കാര്യത്തില്‍ കേന്ദ്രസംസ്ഥാന സര്‍ക്കാരുകള്‍ വിശ്വാസികള്‍ക്കൊപ്പം നില്‍ക്കാത്തതുകൊണ്ടാണ് സമദൂരത്തില്‍ നിന്നും മാറി ശരിദൂരത്തിലേക്ക് പോയതെന്നും എന്‍എസ്എസ് പറയുന്നു.
ഈ എതിര്‍പ്പ് സംസ്ഥാന സര്‍ക്കാരിനെ സമ്മര്‍ദ്ദത്തിലാക്കാനോ അനര്‍ഹമായി എന്തെങ്കിലും നേടാന്‍ വേണ്ടിയോ അല്ല. നവോത്ഥാനത്തിന്റെ പേരില്‍ ജനങ്ങളില്‍ വിഭാഗീയത വളര്‍ത്തുകയും ജാതിമത ചിന്തകള്‍ ഉണര്‍ത്തിയും മുന്നാക്കപിന്നാക്ക ചേരിതിരിവുണ്ടാക്കി രാഷ്‌ട്രീയ മുതലെടുപ്പിനാണ് സംസ്ഥാന സര്‍ക്കാര്‍ ശ്രമിക്കുന്നത്. മന്നാക്ക വിഭാഗങ്ങളിലെ പിന്നാക്കക്കാര്‍ക്ക് ലഭിച്ചുവന്നിരുന്ന ആനുകൂല്യങ്ങള്‍ ഈ സര്‍ക്കാര്‍ തടഞ്ഞുവച്ചിരിക്കുകയാണ്. കൂടാതെ കേന്ദ്രസര്‍ക്കാര്‍ പ്രഖ്യാപിച്ച 10 ശതമാനം മുന്നാക്ക സംവരണം നടപ്പാക്കാതിരിക്കാനുള്ള ബോധപൂര്‍വമായ നീക്കവും സംസ്ഥാന സര്‍ക്കാര്‍ നടത്തുന്നുണ്ടെന്ന് എന്‍എസ്എസ് കുറ്റപ്പെടുത്തി.
