മുംബൈ: ബംഗ്ലാദേശിനെതിരായ ട്വന്റി 20, ടെസ്റ്റ് പരമ്പരയ്‌ക്കുള്ള ടീമിനെ പ്രഖ്യാപിച്ചു. സൗരവ് ഗാംഗുലിയുടെ നേതൃത്വത്തിലുള്ള പുതിയ ഭരണ സമിതി ചുമതലയേറ്റ ശേഷമുള്ള ആദ്യ സെലക്ഷന്‍ കമ്മിറ്റി യോഗമാണ് ടീമിനെ തീരുമാനിച്ചത്. മലയാളി താരം സഞ്ജു സാംസണ്‍ വീണ്ടും ഇന്ത്യന്‍ ടീമില്‍ സ്ഥാനം നേടി. വിക്കറ്റ് കീപ്പറായാണു സഞ്ജുവിനെ ഉള്‍പ്പെടുത്തുക എന്ന് റിപ്പോര്‍ട്ടുകള്‍ ഉണ്ടായിരുന്നെങ്കിലും ബാറ്റ്‌സ്മാനായി ആണ് സഞ്ജുവിനെ ഉള്‍പ്പെടുത്തിയത്. വിക്കറ്റ് കീപ്പറായി ഋഷഭ് പന്ത് തുടരും. വിജയ് ഹസാരെ ട്രോഫിയിലെ ഇരട്ട സെഞ്ചുറി പ്രകടനമാണ് സഞ്ജുവിന് ഗുണമായത്. ഗൗതം ഗംഭീര്‍ ഉള്‍പ്പെടെയുള്ള മുന്‍ താരങ്ങള്‍ പലരും സഞ്ജുവിന് അവസരം നല്‍കണമെന്ന ആവശ്യവുമായി രംഗത്തെത്തിയിരുന്നു. തുടര്‍ച്ചയായി മത്സരങ്ങള്‍ കളിക്കുന്ന ക്യാപ്റ്റന്‍ വിരാട് കോലിക്ക് ട്വന്റി 20 പരമ്പരയില്‍ വിശ്രമം അനുവദിച്ചു. ട്വന്റി 20 പരമ്പരയില്‍ രോഹിത് ശര്‍മ ടീമിനെ നയിക്കും.നവംബര്‍ 11ന് ആരംഭിക്കുന്ന പരമ്പരയില്‍ മൂന്നു ട്വന്റി 20 മത്സരങ്ങളും രണ്ടു ടെസ്റ്റുകളുമാണുള്ളത്.
ട്വന്റി 20 ടീം- രോഹിത് ശര്‍മ (ക്യാപ്റ്റന്‍), ശിഖര്‍ ധവാന്‍, കെ.എല്‍. രാഹുല്‍, സഞ്ജു സാംസണ്‍, ശ്രേയസ് അയ്യര്‍, മനീഷ് പാണ്ഡെ, ഋഷഭ് പന്ത്, വെല്ലിങ്ടണ്‍ സുന്ദര്‍, ക്രുണാല്‍ പാണ്ഡ്യ, യുവേന്ദ്ര ചഹാല്‍, രാഹുല്‍ ചഹാര്‍, ദീപക് ചഹാര്‍, ഖലീല്‍ അഹമ്മദ്, ശിവം ദുബെ, ശ്രദ്ധുല്‍ ഠാക്കൂര്‍.
ടെസ്റ്റ് ടീം– വിരാട് കോഹ്ലി (ക്യാപ്റ്റന്‍), രോഹിത് ശര്‍മ, മായങ്ക് അഗര്‍വാള്‍, ചേതേശ്വര്‍ പൂജാര, അജിങ്ക രഹാനെ, ഹനുമ വിഹാരി, വൃദ്ധമാന്‍ സാഹ, രവീന്ദ്ര ജഡേജ, ആര്‍. അശ്വിന്‍, കുല്‍ദീപ് യാദവ്, മുഹമ്മദ് ഷമി, ഉമേഷ് യാദവ്, ഇഷാന്ത് ശര്‍മ, ശുഭ്മാന്‍ ഗില്‍, ഋഷഭ് പന്ത്.
