കൊല്‍ക്കത്ത: രവി ശാസ്ത്രിയെ വീണ്ടും ഇന്ത്യയുടെ മുഖ്യ പരിശീലകനായി നിയമിക്കേണ്ട ആവശ്യമില്ലെന്ന് നിയുക്ത ബിസിസിഐ അധ്യക്ഷന്‍ സൗരവ് ഗാംഗുലി. ശാസ്ത്രിയെ പരിശീലകനായി തെരഞ്ഞടുത്ത ക്രിക്കറ്റ ഉപദേശക സമിതി തലവന്‍ കപില്‍ദേവ്, അംഗങ്ങളായ ശാന്ത രംഗസ്വാമി, അന്‍ഷുമാന്‍ ഗെയ്‌ക്കുവാദ് എന്നിവര്‍ക്ക് ബിസിസിഐ ഓംബുഡ്‌സ്മാന്‍ ഭിന്നതാല്‍പ്പര്യ വിഷയത്തില്‍ നോട്ടീസ് അയച്ച സാഹചര്യത്തില്‍ ശാസ്ത്രിയെ വീണ്ടും കോച്ചായി തെരഞ്ഞെടുക്കണമെന്ന വാദം ഉയരുന്നത്.
നോട്ടീസ് ലഭിച്ചതിനെ തുടര്‍ന്ന് കപില്‍ദേവും സമിതി അംഗങ്ങളും രാജിവച്ചിരുന്നു. സുപ്രീംകോടതി നിയമിച്ച ക്രിക്കറ്റ് ഭരണസമിതിയാണ് കപില്‍ദേവ് തലവനായ ഉപദേശക സമിതി രൂപീകരിച്ചത്.
ഈ വിഷയം ശാസ്ത്രി മുഖ്യപരിശീലകനായി തെരഞ്ഞെടുത്തതിനെ ബാധിക്കില്ലെന്നാണ് ഞാന്‍ കരുതുന്നത്. ശാസ്ത്രിയെ തെരഞ്ഞെടുക്കുമ്പോഴും ഈ ഭിന്നതാല്‍പ്പര്യ വിഷയും നിലനിന്നിരുന്നെന്ന് ഗാംഗുലി ചൂണ്ടിക്കാട്ടി. ഭിന്നതാല്‍പ്പര്യ വിഷയത്തില്‍ ഉപദേശക സമിതി അംഗങ്ങള്‍ കുറ്റക്കാരാണെന്ന് കണ്ടെത്തിയാല്‍ ശാസ്ത്രിയുടെ നിയമനം റദ്ദാക്കേണ്ടിവരുമെന്ന് ചിലര്‍ വാദിക്കുന്നു. ഈ വിഷയത്തില്‍ പ്രതികരിക്കാന്‍ ക്രിക്കറ്റ് ഭരണസമിതി തലവന്‍ വിനോദ് റോയ് വിസമ്മതിച്ചു.
