തിരുവനന്തപുരം : എസ്എഫ്ഐ പ്രവര്ത്തകര് പരീക്ഷാ തട്ടിപ്പ് നടത്തിയതിനു പിന്നാലെ പിഎസ്സി വീണ്ടും വിവാദത്തില്. ഉയര്ന്ന തസ്തികകളിലേക്ക് നിയമ വിരുദ്ധമായി മാര്ക്ക് നല്കിയെന്നാണ് ആരോപണം. ആസൂത്രണ ബോര്ഡില് പ്ലാന് കോഓര്ഡിനേഷന്, ഡിസെന്ട്രലൈസ്ഡ് പ്ലാനിങ്, സോഷ്യല് സര്വീസസ് എന്നീ മൂന്ന് ഉന്നത തസ്തികകളിലേക്ക് പിഎസ്സി നടത്തിയ ഇന്റര്വ്യൂവിലാണ് നിയമ വിരുദ്ധമായി മാര്ക്ക് നല്കിയത്.
ആസൂത്രണ ബോര്ഡ് ഉപാധ്യക്ഷന് ഉള്പ്പെടെ പിഎസ്സി ചെയര്മാന് അധ്യക്ഷനായ ആറംഗ ബോര്ഡ് നടത്തിയ ഇന്റര്വ്യൂവിലാണ് ഇത്തരത്തില് വഴിവിട്ട് മാര്ക്ക് നല്കിയതായി ആരോപണം ഉയര്ന്നിരിക്കുന്നത്. എഴുത്ത് പരീക്ഷയില് കുറഞ്ഞ മാര്ക്ക് ലഭിച്ചവരെ മുഖാമുഖത്തിലൂടെ കൂടുതല് മാര്ക്ക് നല്കി വിജയിപ്പിച്ച് റാങ്കില് മുന്നിലെത്തിച്ചതെന്നാണ് ആരോപണം.
സുപ്രീംകോടതി മാനദണ്ഡങ്ങള്ക്ക് വിരുദ്ധമായാണ് ഈ നടപടിയെന്നും ആരോപണത്തില് പറയുന്നുണ്ട്. ഇന്റര്വ്യൂവിനു പരമാവധി 70% മാര്ക്കേ നല്കാവൂ എന്നു സൂപ്രീംകോടതിയുടെ മാര്ഗ്ഗനിര്ദേശമുണ്ട്. അത് നിലനില്ക്കേ ആസൂത്രണ ബോര്ഡിലെ മൂന്നു തസ്തികളിലേക്ക് നടത്തിയ എഴുത്തു പരീക്ഷയില് 91 മാര്ക്ക് നേടിയ ഉദ്യോഗാര്ത്ഥിക്ക് മുഖാമുഖത്തില് കിട്ടിയത് 11 മാര്ക്കാണ്. എന്നാല് തസ്തികയിലെ എഴുത്തു പരീക്ഷയില് 52.5 മാര്ക്ക് നേടിയയാളിന് ഇന്റര്വ്യൂവിനു നല്കിയത് 40ല് 36 മാര്ക്ക്.
59.25 മാര്ക്ക് എഴുത്തു പരീക്ഷയില് ലഭിച്ചയാളിനെ ഇന്റര്വ്യൂവില് 28 മാര്ക്കും നല്കി രണ്ടാം റാങ്കിലെത്തിച്ചു. പിഎസ്സി പരീക്ഷ നടത്തുന്ന ഉയര്ന്ന തസ്തികയാണ് പ്ലാനിങ്ങ് ബോര്ഡിലെ ചീഫ് തസ്തിക. ഡിസെന്ട്രലൈസ്ഡ് പ്ലാനിങ്, സോഷ്യല് സര്വീസസ് എന്നീ തസ്തികകളിലേക്കും സമാനമായ രീതിയിലാണ് മാര്ക്ക് നല്കിയത്. ഇതോടെ കുറഞ്ഞ മാര്ക്ക് നേടിയവര് മുഖാമുഖം പരീക്ഷ കഴിഞ്ഞതോടെ റാങ്ക് ലിസ്റ്റില് ആദ്യം എത്തുകയും ചെയ്തു. മുഖാമുഖത്തില് കൂടുതല് മാര്ക്ക് നല്കിയാല് പോലും എഴുത്തു പരീക്ഷയുടെ മാര്ക്ക് അട്ടിമറിക്കുന്ന രീതിയിലാക്കാന് പാടില്ലെന്നുള്ള മാര്ഗ്ഗനിര്ദ്ദേശം നിലനില്ക്കേയാണ് ഈ പരസ്യമായ ലംഘനം.
