തിരുവനന്തപുരം:ഭിന്നശേഷിക്കാര്‍ക്ക് കെഎസ്ആര്‍ടിസി യാത്രാപാസ് ലഭിക്കാനുളള വരുമാനപരിധി ഉയര്‍ത്തി.50,000 രൂപയായിട്ടാണ് വരുമാനപരിധി വര്‍ദ്ധിപ്പിച്ചത്.നേരത്തേ 20,000 രൂപ ആയിരുന്നു.
2024 ലെ ഗതാഗത വകുപ്പിന്റെ ഉത്തരവുപ്രകാരമാണ് വരുമാനപരിധി 20,000 രൂപയായി നിശ്ചയിച്ചത്. ഇതിലെ അപ്രായോഗികതയും ഭിന്നശേഷിക്കാര്‍ നേരിടുന്ന ദുരിതവും ഗതാഗത വകുപ്പിന്റെ ശ്രദ്ധയില്‍പ്പെടുത്തിയതോടെയാണ് പുതിയ ഉത്തരവ്.
സംസ്ഥാന സര്‍ക്കാര്‍ ഭിന്നശേഷിക്കാര്‍ക്ക് നല്‍കുന്ന ക്ഷേമപെന്‍ഷന്‍ പ്രതിമാസം 2,000 രൂപ വരെയാണ്. ഈ തുക മാത്രം വാര്‍ഷികാടിസ്ഥാനത്തില്‍ കണക്കാക്കിയാല്‍ തന്നെ 20,000 രൂപയ്‌ക്കു മുകളില്‍ വരും. മറ്റു വരുമാനമാര്‍ഗങ്ങള്‍ ഇല്ലാത്തവരും ശാരീരിക ബുദ്ധിമുട്ടുകള്‍ കാരണം ജോലികള്‍ക്ക് പോകാന്‍ കഴിയാത്തവരുമായ നൂറുകണക്കിന് ഭിന്നശേഷിക്കാര്‍ക്ക് പുതിയ തീരുമാനം സഹായമാകും.
