തിരുവനന്തപുരം: സര്ക്കാര് പ്ലീഡര് നിയമനത്തില് മുഖ്യമന്ത്രി വിഡി സതീശനും കെ എസ് യുവും തമ്മില് പോര് കടുത്തിരിക്കെ, കെ എസ് യുവിന്റെ ചരിത്രം ഓര്മ്മിപ്പിച്ച് എഐസിസി ജനറല് സെക്രട്ടറി കെ സി വേണുഗോപാല്. കെ എസ് യു- യൂത്ത് കോണ്ഗ്രസ് പ്രവര്ത്തന കാലത്ത് സഹപ്രവര്ത്തകരായിരുന്ന പ്രഫുലചന്ദ്രന്, മാരായമുട്ടം സുരേഷ് എന്നിവരുടെ വേര്പാടില് ആദരാഞ്ജലികള് അര്പ്പിച്ചുള്ള ഫേസ്ബുക്ക് കുറിപ്പിലാണ് കെ എസ് യുവിന്റെ ചരിത്രം അനുസ്മരിക്കുന്നത്.
കെഎസ് യു,യൂത്ത് കോണ്ഗ്രസ് കാലഘട്ടങ്ങളില് ഒപ്പം പ്രവര്ത്തിച്ച രണ്ട് സഹപ്രവര്ത്തകരുടെ വേര്പാട് മനസിലുണ്ടാക്കിയ മുറിവ് ചെറുതല്ല. മൂന്നരപ്പതിറ്റാണ്ട് കാലം മുമ്പുള്ള ചോരമണം നിറഞ്ഞ ഓര്മകളാണ് മരണവിവരം കേട്ടതോടെ തിരയടിച്ചെത്തിയത്. 1989ല് നടന്ന പാഠപുസ്തക സമരം കെഎസ് യുവിന്റെ വളര്ച്ചയുടെ ചരിത്രത്തിലെ സമാനതകളില്ലാത്ത ഏടായിരുന്നു.
തന്നെയും പ്രഫുലചന്ദ്രനെയും ഒന്നിപ്പിച്ചത് കെഎസ്യുവാണ് .ഇന്ന് ഇക്കാണുന്ന ഇന്ത്യന് നാഷണല് കോണ്ഗ്രസ് എന്ന പ്രസ്ഥാനം വാര്ത്തെടുക്കുന്നതില് നിര്ണായക പങ്കുവഹിച്ചതും കെഎസ് യുവിന്റെ പോരാട്ടവീര്യമാണ്. മാരായമുട്ടം സുരേഷും വിദ്യാര്ത്ഥി- യുവജന സമരമുഖങ്ങളില് നെഞ്ചുവിരിച്ചുനിന്ന് പ്രസ്ഥാനത്തെയും പ്രവര്ത്തകരെയും സംരക്ഷിച്ച നേതാവാണെന്ന് ഫേസ്ബുക്കില് കെ സി വേണുഗോപാല് കുറിച്ചു.
കെ എസ് യു സംസ്ഥാന അധ്യക്ഷന് അലോഷ്യസ് സേവിയറെ ഇന്ന് കൊച്ചിയില് നടന്ന പരിപാടിയില് വച്ച് കണ്ടിട്ടും മുഖ്യമന്ത്രി വി ഡി സതീശന് മുഖം കൊടുക്കാതെ പോയിരുന്നു. ഗവണ്മെന്റ് പ്ലീഡര് നിയമനങ്ങളിലെ എതിര്പ്പ് കെ എസ് യു പരസ്യമായി ഉയര്ത്തിയത് നേരത്തേ മുഖ്യമന്ത്രിയെ ചൊടിപ്പിച്ചിരുന്നു.
