ന്യൂദല്ഹി: ഭര്ത്താവിന്റെ നിര്ബന്ധപൂര്വ്വമായ ലൈംഗിക പ്രവൃത്തികള് ഭാര്യയുടെ മരണത്തിനോ പരുക്കിനോ കാരണമാകുന്ന സന്ദര്ഭങ്ങളില്, വൈവാഹിക ബലാത്സംഗം (മാരിറ്റല് റേപ്പ്) കുറ്റകരമാക്കണമെന്ന് ആവശ്യപ്പെട്ട് റെഡ് ഡോട്ട് ഫൗണ്ടേഷന് സമര്പ്പിച്ച ഹര്ജിയില് സുപ്രീം കോടതി കേന്ദ്ര സര്ക്കാരിന് നോട്ടീസ് അയച്ചു. സമാനമായ കേസുകള്ക്കൊപ്പം സെപ്റ്റംബര് 9 ന് ഇക്കാര്യത്തില് അന്തിമ വാദം കേള്ക്കാമെന്ന് കോടതി സമ്മതിച്ചു.
ഭാരതീയ ന്യായ സംഹിതയുടെ സെക്ഷന് 63 ലെ ഒഴിവാക്കല് 2 പ്രകാരം, ഒരു പുരുഷന് തന്റെ പ്രായപൂര്ത്തിയായ ഭാര്യയുമായി ഉഭയസമ്മതമില്ലാതെ ലൈംഗിക ബന്ധത്തിലേര്പ്പെടുന്നതോ ലൈംഗിക പ്രവൃത്തികള് നടത്തുന്നതോ ബലാത്സംഗ കുറ്റമായി കണക്കാക്കില്ല.
ബലാത്സംഗ കുറ്റത്തെ ഒഴിവാക്കുന്നുണ്ടെങ്കിലും, ഉപദ്രവിക്കല്, ഗുരുതരമായ പരിക്കേല്പ്പിക്കല്, കൊലപാതകം തുടങ്ങിയ കുറ്റകൃത്യങ്ങള് ക്രിമിനല് നിയമ പ്രകാരം ശിക്ഷാര്ഹമല്ലെന്ന് വ്യാഖ്യാനിക്കരുത്. അല്ലാത്ത പക്ഷം
ഇത് ഗുരുതരമായ നിയമപരമായ പ്രത്യാഘാതങ്ങള്ക്ക് കാരണമാവും. വിവാഹിതരായ സ്ത്രീകളുടെ സമത്വം, അന്തസ്സ്, ശാരീരിക സ്വയംഭരണം എന്നീ അവകാശങ്ങളെ ഇതു ലംഘിക്കുന്നുവെന്നും ഹര്ജിയില് പറയുന്നു.
