കോഴിക്കോട്: കൂടത്തായി കൊലപാതക പരമ്പരയില് അറസ്റ്റിലായ ജോളിയുമായി സിപിഎം നേതാവിനു ബന്ധമുള്ളതായി കണ്ടെത്തല്. സിപിഎം ലോക്കല് കമ്മിറ്റി സെക്രട്ടറി ഇവരുമായി പണമിടപാട് നടത്തിയതിന്റേയും തെളിവുകള് അന്വേഷണ സംഘത്തിന് ലഭിച്ചിട്ടുണ്ട്. സിപിഎം കട്ടാങ്ങല് ലോക്കല് സെക്രട്ടറിയായ കെ. മനോജിനെതിരെയാണ് കൂടത്തായി കൂട്ടക്കൊലയുമായി ബന്ധപ്പെട്ട് ആരോപണമുയര്ന്നിരിക്കുന്നത്.
മനോജിനെതിരെ ക്രൈംബ്രാഞ്ച് കണ്ടെത്തിയ തെളിവുകള് ശക്തമാണെന്ന് തിരിച്ചറിഞ്ഞതോടെ പാര്ട്ടിയില് നിന്നും പുറത്താക്കി കേസില് നിന്നും തലയൂരാനുള്ള ശ്രമത്തിലാണ് ഇപ്പോള് സിപിഎം പ്രാദേശിക നേതൃത്വം. കൊല്ലപ്പെട്ട ടോം തോമസിന്റെ പേരിലുള്ള സ്വത്ത് ജോളിയുടെ പേരിലേക്ക് മാറ്റിക്കൊണ്ടുള്ള വ്യാജവില്പ്പത്രത്തില് ഒപ്പിട്ടത് മനോജായിരുന്നു. ഇതിനുള്ള പ്രത്യുപകാരമായി ഒരു ലക്ഷം രൂപ ജോളി മനോജിന് കൈമാറിതിന്റെ രേഖകള് അന്വേഷണ സംഘം കണ്ടെത്തിയിട്ടുണ്ട്.
പണം കൈമാറിയതിന് തെളിവായി ചെക്ക് ഉള്പ്പെടെയുള്ള വിവരങ്ങള് ക്രൈംബ്രാഞ്ച് ശേഖരിച്ചിട്ടുണ്ടെന്നാണ് വിവരം. അതേസമയം വില്പ്പത്രത്തില് ഒപ്പുവച്ചിട്ടില്ലെന്നും ഭൂമി കൈമാറ്റ രേഖയില് മാത്രമാണ് താന് ഒപ്പിട്ടതെന്നാണ് മനോജ് പാര്ട്ടി നേതാക്കള്ക്ക് വിശദീകരണം നല്കിയിരിക്കുന്നത്.
ജോളിയുമായുള്ള ബന്ധം കണ്ടെത്തിയതിനെ തുടര്ന്ന് മനോജില് നിന്നും അന്വേഷണ സംഘം മൊഴിയെടുത്തിരുന്നു. എന്നാല് പണം കൈമാറ്റം ഉള്പ്പെടെയുള്ളവയ്ക്ക് തെളിവ് ലഭിച്ച സാഹചര്യത്തില് മനോജിനെ ക്രൈംബ്രാഞ്ച് വീണ്ടും ചോദ്യം ചെയ്തേക്കുമെന്നാണ് സൂചന.
പാര്ട്ടി നടപടിയെക്കുറിച്ച് പ്രതികരിക്കാനില്ലെന്നും കേസിനെ കുറിച്ച് കൂടുതല് അറിയില്ലെന്നുമാണ് കെ. മനോജ് പ്രതികരിച്ചത്. നേരത്തെ ഭര്തൃ പിതാവ് പൊന്നാമറ്റം ടോം തോമസിന്റെ പേരിലുള്ള സ്വത്ത് ജോളിയുടെ പേരിലാക്കി മാറ്റിയെഴുതിയ വ്യാജവില്പത്രത്തില് പ്രദേശവാസികളോ റോയി തോമസിന്റേയോ ബന്ധുക്കളോ അല്ല സാക്ഷിയായി ഒപ്പിട്ടിരിക്കുന്നത് എന്ന കാര്യം ശ്രദ്ധിച്ച പോലീസ് ഇവരെക്കുറിച്ച് വിശദമായി അന്വേഷിച്ചിരുന്നു.
കൂടത്തായി സ്വദേശികളല്ലാത്ത ചൂലൂരില് നിന്നും കുന്ദമംഗലത്ത് നിന്നുമുള്ളവരാണ് സാക്ഷികളായി വില്പ്പത്രത്തില് ഒപ്പുവെച്ചിരിക്കുന്നത്. ഇതിനെതിരെ ജോളിയുടെ ആദ്യ ഭര്ത്താവ് റോയി തോമസിന്റെ സഹോദരന് റോജോയും സഹോദരി റെഞ്ചിയും ആരോപണങ്ങള് ഉന്നയിച്ചിരുന്നു.
ജോളിയുടെ സമീപവാസിയും വീട്ടിലെ നിത്യസന്ദര്ശകനുമായ ഒരു ലീഗ് നേതാവാണ് വ്യാജവില്പത്രം തഹസില്ദാരുമായി ബന്ധപ്പെട്ട് സ്വത്തുകള് ജോളിയുടെ പേരില് മാറ്റിയെഴുത്താന് സഹായിച്ചതെന്നും സൂചനയുണ്ട്. ഇയാളും ജോളിയും ബാങ്കില് പോയി പണമിടപാട് നടത്തിയതിന്റെ സിസിടിവി ദൃശ്യങ്ങളും പോലീസ് ശേഖരിച്ചിട്ടുണ്ട്.
കോഴിക്കോട് സ്വദേശിയായ ഒരു വനിതാ തഹസില്ദാറാണ് വ്യാജവില്പത്രം ആധാരപ്പെടുത്തി സ്വത്തുക്കള് ജോളിയുടെ പേരിലാക്കി നല്കിയതെന്നാണ് വിവരം. കൂടത്തായി പഞ്ചായത്തിലെ രണ്ട് ഉദ്യോഗസ്ഥരും ഇക്കാര്യത്തില് ഇടപെട്ടു. സ്വത്തുകള് വ്യാജവില്പത്രം വച്ച് മാറ്റിയെഴുതിയതായി അറിഞ്ഞ റോയ് മാത്യുവിന്റെ സഹോദരന് റോജോ രേഖകള് ആവശ്യപ്പെട്ട് പലവട്ടം പഞ്ചായത്ത് ഓഫീസില് കയറി ഇറങ്ങിയെങ്കിലും മുസ്ലിം ലീഗ് നേതാവ് വഴി ജോളി നടത്തിയ നീക്കത്തെ തുടര്ന്ന് റോജോയ്ക്ക് രേഖകള് ലഭിച്ചില്ലെന്നാണ് ആരോപണം.
വിവരാവകാശ നിയമപ്രകാരം വരെ രേഖകള്ക്ക് അപേക്ഷിച്ചെങ്കിലും അപേക്ഷ നിഷേധിക്കപ്പെട്ടു. പഞ്ചായത്ത് വൈസ് പ്രസിഡന്റായിരുന്ന ഒരു കോണ്ഗ്രസ് നേതാവും ഇക്കാര്യത്തില് ഇടപെട്ടു എന്നാണ് സൂചന. എന്നാല് ഇവരെയൊന്നും പ്രതിസ്ഥാനത്ത് നിര്ത്താന് ഉതകുന്ന തരത്തിലുള്ള തെളിവുകളൊന്നും ഇതുവരെ പോലീസിന് ലഭിച്ചിട്ടില്ല.
