ന്യൂദല്ഹി: വിമര്ശങ്ങള്ക്കും അഭ്യൂഹങ്ങള്ക്കും ഒടുവില് യുവ വിക്കറ്റ് കീപ്പര് ബാറ്റ്സ്മാന് ഋഷഭ് പന്ത് ഇന്ത്യന് ക്രിക്കറ്റ് ടീമില് നിന്നു പുറത്ത്. നാളെ വിശാഖപട്ടണത്ത് നടക്കുന്ന ദക്ഷിണാഫ്രിക്കയ്ക്കെതിരായ ഒന്നാം ടെസ്റ്റിനുള്ള ടീം ബിസിസിഐ പ്രഖ്യാപിച്ചു. ഋഷഭ പന്തിനു പകരം വൃദ്ധിമാന് സാഹയാണ് വിക്കറ്റ് കീപ്പര്. മികച്ച ഫോമിലുള്ള കേരള താരം സഞ്ജു സാംസണിനും അവസരം ലഭിച്ചില്ല.
കുറച്ചു നാളുകളായി എല്ലാ കോണുകളില് നിന്നും ഋഷഭ് പന്തിനെതിരെ വിമര്ശനം ഉയരുകയായിരുന്നു. ക്യാപ്റ്റന് വിരാട് കോഹ്ലി മുതല് മുഖ്യ സെലക്ടര് എം എസ് കെ പ്രസാദ് വരെ രൂക്ഷമായ ഭാഷയിലാണ് യുവതാരത്തിനെതിരെ പ്രതികരിച്ചത്. അവസരങ്ങള് നല്കുമ്പോഴും അതൊന്നും വകവയ്ക്കാതെ അനാവശ്യ ഷോട്ടിലൂടെ പുറത്താകുന്നതാണ് പന്തിനെതിരെ ആയുധമാക്കുന്നത്. ദക്ഷിണാഫ്രിക്കയ്ക്ക് എതിരായ ട്വന്റി-20 പരമ്പരയിലും നിരാശപ്പെടുത്തിയ പന്തിനെ ടെസ്റ്റ് ടീമില് നിന്ന് ഒഴിവാക്കുമെന്ന് റിപ്പോര്ട്ട് ഉണ്ടായിരുന്നു. പന്തിന് അവസരം നല്കുന്നതില് സെലക്ടര്മാര്ക്ക് എതിര്പ്പില്ലെങ്കിലും ഇനിയും വിട്ടു വീഴ്ച വേണ്ടെന്ന നിലപാടിലായിരുന്നു പരിശീലകന് രവിശാസ്ത്രിയും കോഹ്ലിയും.
ബാറ്റിംഗില് തിളങ്ങാത്തത് പന്തിന്റെ കീപ്പിംഗിന് ദോഷകരമായി ബാധിക്കുന്നുണ്ട്. ഇന്ത്യയിലെ സ്പിന് പിച്ചുകളില് പന്തിനെക്കാള് മികച്ച വിക്കറ്റ് കീപ്പര് സാഹയാണ്. റണ്സ് കണ്ടെത്താനും സാഹയ്ക്കാകുമെന്നും ബിസിസിഐ വിലയിരുത്തി. ടെസ്റ്റ് ടീമില് നിന്ന് ഒഴിവാക്കപ്പെട്ടത് പന്തിന് കനത്ത തിരിച്ചടിയായിട്ടുണ്ട്. സാഹ ടെസ്റ്റ് ടീമില് തുടരുകയും പരിമിത ഓവര് മത്സരങ്ങളില് സഞ്ജു വി സാംസണെ മാനേജ്മെന്റും സെലക്ടര്മാരും പരിഗണിക്കുമെന്നാണ് റിപ്പോര്ട്ട്.
ആദ്യ ടെസ്റ്റിനുള്ള ഇന്ത്യന് ടീം- വിരാട് കോഹ്ലി (ക്യാപ്റ്റന്), അജിങ്ക രഹാനെ, രോഹിത് ശര്മ, മായങ്ക് അഗര്വാള്, ചേതേശ്വര് പൂജാര, ഹനുമ വിഹാരി, ആര്. അശ്വിന്, രവീന്ദ്ര ജഡേജ, വൃദ്ധിമാന് സാഹ(വിക്കറ്റ് കീപ്പര്), ഇഷാന്ത് ശര്മ, മുഹമ്മദ് ഷാമി.
