സ്‌കൂളുകളില്‍ മലയാളം സംസാരിക്കാന്‍ അനുവദിക്കാത്തതിനാല്‍ ഇംഗ്ലീഷ് മീഡിയം കുട്ടികള്‍ക്ക് പത്താം ക്ലാസ് കഴിഞ്ഞാലും മലയാളം മനസ്സിലാക്കാനും എഴുതാനും കഴിയാത്ത സ്ഥിതിയാണെന്ന് ഔദ്യോഗിക ഭാഷ സംബന്ധിച്ചുള്ള നിയമസഭാസമിതിയുടെ റിപ്പോര്‍ട്ടില്‍ പറയുന്നു.
പൊതുവിദ്യാഭ്യാസ മേഖലയില്‍ ‘മലയാളം പള്ളിക്കൂടം’ മാതൃകയില്‍ മലയാള പരിശീലനം നല്‍കുന്നതിനെക്കുറിച്ചുള്ള പഠനറിപ്പോര്‍ട്ടാണിത്. മലയാളം ഒഴിവാക്കി മറ്റുഭാഷകളാണ് പലയിടത്തും പഠിപ്പിക്കുന്നത്. സ്വകാര്യ അണ്‍എയ്ഡഡ് ഇംഗ്ലീഷ് മീഡിയം സ്‌കൂളുകളില്‍ പ്രദര്‍ശിപ്പിക്കുന്ന ‘സ്പീക്ക് ഇന്‍ ഇംഗ്ലീഷ്’ ബോര്‍ഡുകള്‍ നീക്കം ചെയ്യാന്‍ നടപടി എടുക്കണമെന്ന് സമിതി ശുപാര്‍ശ ചെയ്തിരുന്നു. എന്നാല്‍, ഇത്തരം സ്‌കൂളുകളില്‍ ഇപ്പോഴും മലയാളം സംസാരിക്കാന്‍ വിലക്കുണ്ടെന്നാണ് റിപ്പോര്‍ട്ട്. മലയാളം പറയുന്ന കുട്ടികള്‍ക്ക് ഇംപോസിഷന്‍ (എഴുത്തുശിക്ഷ) കൊടുക്കുന്നതും സമിതിയുടെ ശ്രദ്ധയില്‍പ്പെട്ടിട്ടുണ്ടത്രെ.
മലയാളനാട്ടിലെ ഈ സ്ഥിതിവിശേഷം ഭാഷാസ്‌നേഹികളെ അത്ഭുതപ്പെടുത്തുന്നുണ്ടാവില്ല. ദശാബ്ദങ്ങളായി കേട്ടുകൊണ്ടിരിക്കുന്നതാണ് ഇത്തരം പരാതികള്‍. സ്വന്തമായതിനെയെല്ലാം തള്ളിപ്പറയുന്നതാണ് പുരോഗമനമെന്ന് മലയാളികളില്‍ വലിയൊരുവിഭാഗം കരുതുന്നു. വേഷത്തിലെയും ഭക്ഷണത്തിലെയും മലയാളത്തനിമകളെ ഉപേക്ഷിച്ചവര്‍ ഭാഷയെ അവഗണിക്കുകയും അപഹസിക്കുകയും ചെയ്യാതിരിക്കുമോ? കാപട്യം മുഖമുദ്രയാക്കിയിരിക്കുന്ന ഇത്തരക്കാരുടെ താത്പര്യം കുട്ടികളിലും അടിച്ചേല്‍പ്പിക്കുന്നവര്‍ക്ക് അധികൃതര്‍ കൂട്ടുനില്‍ക്കുന്നു എന്നാണ് നിയമസഭാ സമിതിയുടെ റിപ്പോര്‍ട്ടില്‍നിന്നു വ്യക്തമാകുന്നത്.
ശ്രേഷ്ഠ ഭാഷാപദവിയും ഭരണഭാഷാപദവിയും സ്‌കൂള്‍ വിദ്യാഭ്യാസ തലത്തില്‍ മലയാളത്തിന്റെ രക്ഷക്കെത്തുന്നില്ലെന്ന് ഇംഗ്ലീഷ് മീഡിയം സ്‌കൂളുകളിലെ സ്ഥിതി ഓര്‍മ്മിപ്പിക്കുന്നുണ്ട്. ഇംഗ്ലീഷ് മീഡിയം സ്‌കൂളുകളില്‍ മലയാളം പറയുന്നവര്‍ക്ക് കിട്ടുന്ന ശിക്ഷ, ഫലത്തില്‍ മലയാളത്തിന് കിട്ടുന്ന ശിക്ഷതന്നെയാണ്. മലയാളം അന്യമാകുന്ന തലമുറയെ വരേണ്യവിഭാഗമായി കാണാനും ഇവിടെ മലയാളികളുണ്ടാകും.
മറ്റെല്ലാ സംസ്ഥാനങ്ങളിലും പിഎസ്‌സി തൊഴില്‍ പരീക്ഷകള്‍ മാതൃഭാഷയിലാണ് നടത്തുന്നത്. ഇവിടെ പിഎസ്‌സി മലയാളത്തെ മാറ്റിനിര്‍ത്തിയിരിക്കുന്നു. മലയാളത്തിന്റെ ശ്രേഷ്ഠഭാഷാ, ഭരണഭാഷാ പദവികള്‍ പിഎസ്‌സിയും കാര്യമാക്കിയിട്ടില്ല! മലയാളഭാഷയെ സംരക്ഷിക്കാനും ഭാഷാഭിമാനം വളര്‍ത്താനും വേണ്ടതെല്ലാം ചെയ്യുമെന്നുപറയുന്ന ഭരണാധികാരികള്‍ ഇതൊന്നും കണ്ടില്ലെന്ന് നടിക്കുന്നു! ഇങ്ങനെ പലതലങ്ങളിലും മലയാളം ശിക്ഷിക്കപ്പെടുകയാണ്. മാതൃഭാഷ ഇത്രയേറെ നിന്ദിക്കപ്പെടുന്നത് കേരളത്തില്‍ മാത്രമായിരിക്കും.
പത്രങ്ങളില്‍നിന്ന്:
‘മണ്ഡപത്തില്‍ 800 പേര്‍ക്ക് ഇരിക്കാനും ഭക്ഷണശാലയില്‍ ഒരേസമയം 500 പേര്‍ക്ക് ഇരിക്കാനുമുള്ള സൗകര്യവുമുണ്ടാകും’.
‘മണ്ഡപത്തില്‍ 800 പേര്‍ക്കും ഭക്ഷണശാലയില്‍ ഒരേസമയം 500 പേര്‍ക്കും ഇരിക്കാനുള്ള സൗകര്യമുണ്ടാകും’ (ശരി).
‘ഒരു വ്യക്തിയെ സമൂഹമോ അവരുടെ ജാതിക്കോ സമുദായത്തിനോ മാനക്കേടുണ്ടാക്കിയെന്ന ദുരാരോപണം നടത്തി ഒരാളെ വധിക്കുന്നതിലും ഹീനമായ കുറ്റകൃത്യമില്ല’.
ആരോപണത്തെയും ഇങ്ങനെ നടത്തണോ? ആരോപിക്കുകയോ ആരോപണം ഉന്നയിക്കുകയോ ചെയ്താല്‍ പോരേ?
‘ജാതിക്കോ സമുദായത്തിനോ മാനക്കേടുണ്ടാക്കിയെന്നാരോപിച്ച്് ഒരു വ്യക്തിയോ സമൂഹമോ ഒരാളെ വധിക്കുന്നതിലും ഹീനമായ കുറ്റകൃത്യമില്ല’ ഇത്രയേ വേണ്ടു.
‘മഹാപ്രളയത്തിന് ശേഷം കാര്‍ഷിക മേഖലയിലുണ്ടായ മുരടിപ്പ് മാറ്റിയെടുക്കുന്നതിനും കൃഷിയും കൃഷിയിടവും കാലിസമ്പത്തുമൊക്കെ നശിച്ചുപോയ കര്‍ഷകര്‍ക്ക് വീണ്ടും കൃഷിയിലേക്ക് മടങ്ങിവരുന്നതിന് ആവശ്യമായ ധൈര്യവും പ്രോത്സാഹനവും പിന്തുണയും സാമ്പത്തിക സഹായവും നല്‍കുക എന്നതാണ് സര്‍ക്കാര്‍ നയം’
വികലവും ദീര്‍ഘവുമായ വാക്യം ഇങ്ങനെ തിരുത്താം:
‘മഹാപ്രളയത്തിനുശേഷം കാര്‍ഷികമേഖലയിലുണ്ടായ മുരടിപ്പ് മാറ്റാനും കൃഷിയും കൃഷിയിടവും കാലിസമ്പത്തുമൊക്കെ നശിച്ചുപോയ കര്‍ഷകര്‍ക്ക് വീണ്ടും കൃഷിയിറക്കാനും ആവശ്യമായ പ്രോത്സാഹനവും സാമ്പത്തിക സഹായവും നല്‍കുക എന്നതാണ് സര്‍ക്കാര്‍ നയം.’
പിന്‍കുറിപ്പ്
‘മാതൃഭാഷ ഭരണഭാഷ എന്നതാണ് സര്‍ക്കാര്‍ നയം’.മാതൃഭാഷ ഏതെന്നേ തീരുമാനിക്കാനുള്ളു.
ജന്മഭൂമി ഓണ്‍ലൈന്‍