പാല: ശബരിമലയുടെ പവിത്രത നിലനിര്ത്താന് സുപ്രീംകോടതി വിധിക്കെതിരെ നിയമം കൊണ്ടുവരാനുള്ള നടപടികള് പരിഗണനയിലെന്ന് കേന്ദ്രമന്ത്രി സദാനന്ദ ഗൗഡ. കേന്ദ്ര സര്ക്കാരിലെ ഉന്നത നേതാക്കള് ഇക്കാര്യം ചര്ച്ച ചെയ്യുന്നുണ്ട്. ഒന്നോ രണ്ടോ ദിവസം കൊണ്ട് സര്ക്കാരിന് ബില്ല് കൊണ്ടുവരാനാകില്ല. വിധിക്കെതിരെ കേരളത്തില് ബിജെപി സമരം ചെയ്തത് കേന്ദ്ര നേതൃത്വത്തിന്റെ നിര്ദ്ദേശപ്രകാരമാണെന്നും സദാനന്ദ ഗൗഡ ഏഷ്യാനെറ്റ് ന്യൂസിന് നല്കിയ അഭിമുഖത്തില് വ്യക്തമാക്കി. ബിജെപി പാലാ നിയോജക മണ്ഡലം കണ്വെന്ഷന് ഉദ്ഘാടനം ചെയ്യാനാണ് സദാനന്ദ ഗൗഡ പാലായില് എത്തിയത്.
ശബരിമലയില് സമ്മര്ദ്ദം വേണ്ടിവരില്ലെന്നും കേന്ദ്രം നിയമം നിര്മ്മിച്ചോളുമെന്നും നേരത്തെ ശബരിമല കര്മസമിതി വ്യക്തമാക്കിയിരുന്നു. ശബരിമല ആചാരസംരക്ഷണത്തിന് കേന്ദ്രസര്ക്കാര് നിയമനിര്മ്മാണം നടത്തുമെന്ന് ശബരിമല കര്മസമിതി രക്ഷാധികാരി സ്വാമി ചിദാനന്ദപുരി പറഞ്ഞിരുന്നു. ഇക്കാര്യത്തില് കര്മസമിതിയുടെ സമ്മര്ദ്ദത്തിന്റെ ആവശ്യം വരില്ലെന്നും പ്രധാനമന്ത്രി ഇക്കാര്യത്തില് ഉറപ്പു നല്കിയിട്ടുണ്ടെന്നുമാണ് അദേഹം വ്യക്തമാക്കിയത്.
നേരത്തെ വിശ്വാസികള്ക്ക് ഭരണഘടനാപരമായ സംരക്ഷണം ഉറപ്പുവരുത്തുമെന്ന് കോഴിക്കോട്ട് നടന്ന ലോകസഭാ തെരഞ്ഞെടുപ്പ് റാലിയില് പ്രധാനമന്ത്രി നരേന്ദ്ര മോദി വ്യക്തമാക്കിയിരുന്നു. വിശ്വാസവും ആചാരങ്ങളും സുപ്രീംകോടതിയ്ക്ക് മുമ്പാകെ കൃത്യമായി അവതരിപ്പിക്കുമെന്നും ഭരണഘടനാപരമായ സംരക്ഷണം ഉറപ്പാക്കുമെന്നും പ്രകടനപത്രികയിലും ബിജെപി ഉറപ്പ് നല്കിയിരുന്നു. എന്.കെ പ്രേമചന്ദ്രന്റെ ശബരിമല സ്വകാര്യബില് അപൂര്ണമാണെന്നും സമഗ്രമായ നിയമനിര്മ്മാണമാണ് വേണ്ടതെന്നും ബിജെപി എംപി മീനാക്ഷി ലേഖി അടുത്തിടെ ലോകസഭയിലും വ്യക്തമാക്കി. സുപ്രീം കോടതിയിലെ നിയമനടപടികള് പൂര്ത്തിയായതിന് ശേഷം ഭരണഘടനാ ഭേദഗതി ഉള്പ്പെടെയുള്ള കാര്യങ്ങള് പരിഗണിക്കുമെന്നാണ് കേന്ദ്ര സര്ക്കാര് നല്കുന്ന സൂചന. വര്ഷങ്ങളായി നിയമയുദ്ധം നടന്നുവരുന്ന രാമജന്മഭൂമി വിഷയത്തിലും ഇതേ നിലപാടാണ് സര്ക്കാരിനുള്ളത്.
