ബംഗളുരു: ഇന്ത്യന് പ്രസിഡന്റാകാനുള്ള വഴികള് എന്തൊക്കെയെന്ന് പ്രധാനമന്ത്രിയോട് വിദ്യാത്ഥിയുടെ ചോദ്യം. ചാന്ദ്രയാന് രണ്ടിന്റെ ലാന്റിംഗിന് സാക്ഷികളാകാന് ഐഎസ്ആര്ഒ ഹെഡ്ക്വാര്ട്ടേഴ്സിലെത്തിയ എഴുപത് സ്കൂള് വിദ്യാര്ത്ഥികളോട് സംവദിക്കുകയായിരുന്നു പ്രധാനമന്ത്രി നരേന്ദ്രമോദി. ഇന്ത്യന് പ്രസിഡന്റാകാനുള്ള വഴികള് ചോദിച്ച ഒരു വിദ്യത്ഥിയോട് എന്തുകൊണ്ട് പ്രധാനമന്ത്രിയാകാന് ലക്ഷ്യം വയ്ക്കുന്നില്ലാ എന്നായിരുന്നു പ്രധാനമന്ത്രിയുടെ മറുചോദ്യം.
‘എന്തുകൊണ്ട് പ്രസിഡന്റ് ? പ്രധാനമന്ത്രിയാകേണ്ടേ ?’ – മോദി തിരിച്ചുചോദിച്ചു. ജീവിതത്തില് വിജയം നേടാന് നന്നായി പഠിക്കുകയും കഠിനമായി അധ്വാനിക്കുകയും അതുവഴി ആത്മവിശ്വാസം ഉണ്ടാക്കി എടുക്കുകയും വേണമെന്ന് പ്രധാനമന്ത്രി കുട്ടികളോടായി പറഞ്ഞു. ചെറിയ ചെറിയ നേട്ടങ്ങളിലൂടെയാണ് വലിയ വിജയങ്ങള് നേടുകയെന്നും അദ്ദേഹം കൂട്ടിച്ചേര്ത്തു. ശേഷം കുട്ടികളോടൊത്ത് ഫോട്ടോക്ക് പോസ് ചെയ്താണ് പ്രധാനമന്ത്രി മടങ്ങിയത്.
ചന്ദ്രയാന് രണ്ട് അനിശ്ചിതത്വത്തില് ആയതു മുതല് വിങ്ങിയ മനസും പുഞ്ചിരിയെന്നു വരുത്തിയ മുഖവുമായാണു ഐഎസ്ആര്ഒ ചെയര്മാന് കെ. ശിവന് നിന്നിരുന്നത്. സഹപ്രവര്ത്തകര്ക്കൊപ്പം വിവരങ്ങള് പങ്കുവയ്ക്കുമ്പോഴും അവസാനനിമിഷത്തിലെ ചെറിയ പിഴവ് എന്താണെന്നു കൃത്യമായി മനസിലാക്കാന് സാധിച്ചിരുന്നില്ല ഇസ്രോയിലെ ശാസ്ത്രജ്ഞന്മാര്ക്ക്. പ്രധാനമന്ത്രി നരേന്ദ്ര മോദി ചന്ദ്രയാന് സംബന്ധിച്ച വിവരങ്ങള് ലോകവുമായി പങ്കിടുമ്പോഴും ഇന്ത്യന് ശാസ്ത്രലോകത്തിനെ വിശ്വാസത്തിന്റെ നെറുകയില് എത്തിച്ചിരുന്നു. പ്രധാനമന്ത്രി രാജ്യത്തെ അഭിസംബോധന ചെയ്തു കഴിയും വരെ പിടിച്ചു നിന്ന ഇസ്രോ ചെയര്മാന് കെ. ശിവന് പക്ഷേ മോദിയെ യാത്രയാക്കാന് പുറത്തിറങ്ങയിപ്പോള് നിയന്ത്രണം വിട്ടു. കണ്ണട ഊരി വിങ്ങിപൊട്ടിയ ശിവനെ മിനിറ്റുകളോളം നെഞ്ചോടു ചേര്ത്ത് ചുമലില് തലോടി ആശ്വസിപ്പിച്ചു പ്രധാനമന്ത്രി. ഇന്ത്യക്കാരുടെ കണ്ണുനനയിച്ച നിമിഷങ്ങളായിരുന്നു അത്.
ശാസ്ത്രജ്ഞരെ സല്യൂട്ട് ചെയ്യുന്നതായി പ്രധാനമന്ത്രി പറഞ്ഞു. കഴിഞ്ഞ കുറച്ചു മണിക്കൂറുകളായി നിങ്ങള് ഏത് അവസ്ഥയിലൂടെയാണു കടന്നുപോകുന്നതെന്ന് നിങ്ങളുടെ കണ്ണുകള് പറയുന്നുണ്ട്. നിങ്ങള്ക്കെല്ലാവര്ക്കും ഇന്ത്യയുടെ ആദരമുണ്ടാകും. ഞാന് നിങ്ങളെ സല്യൂട്ട് ചെയ്യുന്നു ശാസ്ത്രജ്ഞരോടു പ്രധാനമന്ത്രി പറഞ്ഞു. കുറച്ചു മണിക്കൂറുകളായി രാജ്യമാകെ സങ്കടത്തിലാണ്. നമ്മുടെ ശാസ്ത്രജ്ഞരുടെ കൂടെ എല്ലാവരും ഐക്യപ്പെടുകയാണ്. ഈ ബഹിരാകാശ പദ്ധതിയില് നമുക്ക് അഭിമാനമുണ്ട്. ഇതോടെ ചന്ദ്രനെ തൊടാനുള്ള ഇന്ത്യയുടെ പ്രതിജ്ഞ കൂടുതല് ശക്തമായതായും പ്രധാനമന്ത്രി പറഞ്ഞു. നമ്മുടെ ചരിത്രത്തില് തന്നെ പല സാഹചര്യങ്ങളിലും പതുക്കെയായിപ്പോയിട്ടുണ്ടെന്നും മോദി പറഞ്ഞു. പക്ഷേ നമ്മുടെ മനോഭാവത്തെ അതൊന്നും തകര്ത്തിട്ടില്ല. നമ്മള് തിരിച്ചുവന്ന് നിരവധി നേട്ടങ്ങള് സ്വന്തമാക്കി. നമ്മുടെ സംസ്കാരം ഉന്നതങ്ങളിലെത്താന് കാരണവും അതാണ്. ഐഎസ്ആര്ഒ സംഘം കഠിനാധ്വാനം ചെയ്തു, ഒരുപാടു ദൂരം സഞ്ചരിച്ചു, ഈ പാഠമാണ് നമ്മോടൊപ്പം ഉണ്ടാകേണ്ടതെന്നും പ്രധാനമന്ത്രി വ്യക്തമാക്കി.
