ആലപ്പുഴ: നെഹ്റുട്രോഫിയുടെ ഉദ്ഘാടന വേദിയില് ഇന്ത്യയുടെ ക്രിക്കറ്റ് ഇതിഹാസം സച്ചിന് ടെണ്ടുല്ക്കര്ക്ക് സമ്മാനിച്ച പങ്കായം മോഷണം പോയി. തനിക്ക് ലഭിച്ച സമ്മാനം മോഷണം പോയ സംഭവം സച്ചില് തന്നെയാണ് അറിയിച്ചത്. നെഹ്റുട്രോഫിയുടെ ഉദ്ഘാടന വേദിയില് ആലപ്പുഴ കൃപ ആര്ട്ടിലെ അജേഷ് ജോര്ജാണ് സച്ചിന് പങ്കായം (തുഴ) സമ്മാനിച്ചത്. നെഹുറുട്രോഫിയുടെയും പ്രഥമ സിബിഎല്ലിന്റെയും ഉദ്ഘാടന വേദിയിലായിരുന്നു വ്യത്യസ്തമായ സമ്മാനം അജേഷ് സച്ചിന് സമ്മാനിച്ചത്. കുതിക്കുന്ന ചുണ്ടനില് ക്രിക്കറ്റ് ബാറ്റുമായി നിലക്കാരനായി നില്ക്കുന്ന സച്ചിന്റെ ചിത്രം വരച്ച പങ്കായമാണ് സമ്മാനിച്ചത്.
എന്നാല്, കഴിഞ്ഞ ദിവസം സച്ചിനൊപ്പമുള്ള മലയാളി അജേഷിനെ ഫോണില് വിളിച്ച് ഉദ്ഘാടനവേദിയില് നിന്നും ലഭിച്ച സമ്മാനം മോഷണം പോയ വിവരം അറിയിച്ചത്. സമ്മാനങ്ങള് മടക്കയാത്രയില് കൊണ്ടുപോകുന്നതിനുള്ള തയ്യാറെടുപ്പുകള് നടത്തുമ്പോഴാണ് സച്ചിനെ ആകര്ഷിച്ച സമ്മാനം കാണാതായ വിവരം ഒപ്പമുള്ളവരും അറിയുന്നത്. ഉദ്ഘാടന സമ്മേളത്തിന് ശേഷം മടക്കയാത്രക്ക് ബോട്ടിലേക്ക് സച്ചിന് കയറുമ്പോള് ഉപഹാരങ്ങളുടെ കൂട്ടത്തില് ഇത് ഉണ്ടായിരുന്നില്ലായെന്നാണ് അജേഷിന്റെ അന്വേഷണത്തില് അറിയാന് കഴിഞ്ഞത്. സമ്മാനം കാണാതായ വിവരം ബന്ധപ്പെട്ട അധികാരികളെ അറിയിച്ചപ്പോള് അന്വേഷിക്കാമെന്ന മറുപടിയാണ് ലഭിച്ചത്. കാണാതായ പങ്കായതുഴ തിരിച്ചു കിട്ടാത്തപക്ഷം സമാനമായ ചിത്രം തുഴയില് വരച്ച് താരത്തിന് വീണ്ടും സമ്മാനം നല്കാനാണ് അജേഷിന്റെ തീരുമാനം. മോഷണം വിവരം പുറത്തായതോടെ ജില്ലാ ഭരണകൂടവും അന്വേഷണം ആരംഭിച്ചിട്ടുണ്ട്.
